VOV4.K’ho- Tàm dơ̆ Pơrjum hòi jà bơcri priă tàm tiah Kông nghệ kao ƀòn dờng Hồ Chí Minh drim ngai 27/6, Ủy ƀan Ñân zân ƀòn dờng Hồ Chí Minh neh jàu kơrnuat ring bal gùng dà bơcri priă ai rơndap broă lơh R&D- Anih tờm kơlôi sơnơng mờ bơto bơtê mờng chài uă sơm gơ drồl mhàm tơngoh S.I.S ƀòn dờng Hồ Chí Minh (Tập đoàn bơt bơtàu Hòa Bình) mờ sră cơng tàng bơcri priă ai rơndap broă lơh Kông ty TNHH Điện tử Samsung HCMC CE Complex.

Bơh 20 nam lơh broă, tus tŭ do, tiah Kông nghệ kao ƀòn dờng neh lơh sră cih mat bơcri priă ai 163 rơndap broă lơh in mờ kờp jơh priă bơcri geh rlau 12 tơmàn dolar Mỹ. Tàm hơ̆, priă bơcri lơgar ndai rlau 10 tơmàn dolar Mỹ, priă bơcri tàm lơgar mờr 2 tơmàn dolar Mỹ. Ală mpồl lơh sa kă bro ờ mìng lơh broă geh cồng nha mờ gam sùm tơnguh priă bơcri, tă priă rề ơnàng lơh sa tàm tiah Kông nghệ kao, tă pơgồp kuơmàng tàm priă geh bơh tac mờ blơi phan bơh lơgar ndai ƀòn dờng Hồ Chí Minh dê.

Cau mblàng K’Duẩn