VOV4.K’ho- Kòi là phan tam cèng wơl priă lơh geh tờm ai cau lơh broă sa in tàm kơnhoàl Ea Súp, càr Dăk Lăk. Bulah bè hơ̆, priă lơh geh tờm bơh cau lơh broă sa tàm kơnhoàl Ea Súp dê gam gơtìp pơhìn tài bơh ñui lơh aniai gam sa gơ rề uă mờ lơh aniai uă ngan. Cau lơh broă, ală kâp gơnoar ătbồ mờ anih lơh broă geh gơrềng bơh kơnhoàl dê gam sơrbac mhar lơh ală broă lơh rơcăng sơndră mờ kơryan ñui lơh aniai, sền gàr phan tam.

Rlau dùl poh do, Mpồl Cau lơh broă sa xã Ea Lê, là xã geh bă sre lơh kòi dờng ngan rlau jơh bơh kơnhoàl Ea Súp, càr Dăk Lăk dê gơlơh ờ ru tŭ ngan tài bơh ñui gam lơh aniai pràn ngan tàm xã do. Jăt mò Trần Lệ Thủy, Phó Kwang ătbồ Mpồl cau lơh broă sa xã Ea Lê, pà gĭt: do là kàl lơh kòi gơtìp ñui lơh aniai kơn jơ̆ ngan rlau jơh tàm 6 nam do. Mpồl neh pơgồp bal mờ anih dong kờl bơto pơlam lơh broă sa, anih sền gàr phan tam kơnhoàl dê, lòt sền broă gơlik geh ngan ngồn nàng di tŭ bơto sồr làng bol lơh broă sa bè ală broă lơh bơsong gơ in dipal. Mò Trần Lệ Thủy, đơs, tài bơh ñui lơh bơtờp mhar ngan, bàr pe hìu bơnhă cau lơh broă sa neh pal toès kòi ờ hềt dum ngan. Bàr pe hìu ndai kong mờ broă sơrbì kòi. Mò Trần Lệ Thủy, đơs: Bơtờp ñui tàm kòi gam dềt den cau sền bè là sơrbì. Ai ală hìu bơnhă mờ kòi mờr dum, ờ hềt tus tơngai toès den kung pal toès sơl. Mờ dilah khăt lời bè hơ̆ den ñui gơ sa jơh den là roh gời jơh. Bè hơ̆ là xã digơlan ờ geh tơnhàu, mờ tơngai prang duh do là kòi dum tờm tàm nam.

Xã Ea Lê kàl do, kòi neh sơnđờm dum rơmĭt niam ngan, gơ dă jòng bàr gah gùng lòt tus ală xã. Ntàu bơh tàm gùng sền kung gơtùi gŏ sơl ală lŏ kòi là ală anih gơtìp ñui sa rơđò jơh. Tơnơ̆ dùl poh lòt còp kòi rê, ồng Nguyễn Đức Thịnh ơm tàm thôn 3, xã Ea Lê rơteh bồ muăt jrùm tài bơh kòi gơtìp ñui lơh aniai uă ir. Ồng Nguyễn Đức Thịnh muăt jrùm đơs: Ñui gơ sa uă ngan. Den bi sền den, tàm lŏ sre do mù tàm sre lòt sền den hơ̆ sồng gŏ jơh, wih rơngòt ir ih. Ne ne, bè bàr pe anih ne ne, neh gơtìp ñui sa rơđò jơh cồng jơh nha kòi.

Tàm khà ală cau lơh broă sa pal toès kòi ờ hềt dum ngan nàng pleh gơtìp ñui lơh aniai jơh, bi Hồ Giáp ơm tàm thôn 3, neh toès geh 4 sào kòi tàm kờp jơh bă sre ơnàng rlau 2 lồ bơh hìu bơnhă bi dê. Bi Giáp pà gĭt, kung 4 sào do sơl, kàl lài hìu bơnhă lơh geh 3 tấn nggùl kòi, mơya kàl do mìng lơh geh 2 tấn nggùl lơm. Kàl lài, hìu bơnhă ngui jơh bal rơhe nàng ròng rơpu kơnrồ, mơya kàl do rơhe pal chu sơrbì jơh. Bi Hồ Giáp, đơs: Ngai do toès, dilah mang do ờ mìu là ngai hìng gơtùi chu jơh. Chu di là niam ngan tài bơh ală tăp ñui geh gơtìp bơrtoh ồs sa jơh. Ai dilah ờ, lời tus kàl tơnơ̆ gơ geh duh dùh rơ̆ rài ngan mờ mhar ngan.

Kàl toès kòi kàl mrềl prang nam 2021- 2022 tàm Ea Súp sơnđờm bơh ală lŏ sre pal tàm ntoăt  pơrlòng mờ ñui

Jăt Anih sền gàr phan tam kơnhoàl Ea Súp yal, di pơgăp 6 nam, ñui lơh aniai jòi geh dùl dơ̆ tàm ală bă sre bơh kơnhoàl dê, mơya kàl do bơta ñui lơh aniai kơn jơ̆ rlau mờ ală dơ̆ lài. Ngan là tàm Ƀlàng sre 1, xã Ea Lê, anih lơh broă bol añ dê neh gŏ uă lŏ sre gơtìp ñui sa rơđồ jơh nha rơñah rơñơ ngan, kờp jơh bă kòi gơtìp ñui lơh aniai ơnàng rlau 20 lồ. Jăt ồng Nguyễn Văn Thủy, Kwang ătbồ Anih sền gàr phan tam kơnhoàl Ea Súp dê yal: nàng kơryan jơnau pơhìn ñui lơh aniai uă, lơh gơrềng tus kàl lơh sa tơnơ̆, anih lơh broă bol añ dê neh sơlơ mblàng yal, bơto yal ală broă lơh bơta chài dipal. Mơkung sơlơ jăt sền drà sơnơm sền gàr phan tam, pleh broă sơmờm tơnguh giă, lơh gơlik tai bơta kơn jơ̆ ai cau lơh broă sa in. Ồng Nguyễn Văn Thủy đơs: Bàr pe lŏ sre gơtìp ñui lơh aniai, mơya mìng gam bàr pe ngai tai là tus ngai toès den bol añ sồr làng bol mhar lòt toès gờñ. Mờ lŏ sre lơi ờ gơtùi toès den ƀồm sơnơm. Dơ̆ bàr là bol añ kung tus ală anih tăc sơnơm sền gàr phan tam, sồr jơh ală ờ geh gơnoar sơmờm tơnguh giă tàm tŭ kòp bơtờp bè do. Dilah bol añ gŏ tiah lơi lơh tìs den là dan mờ kâp hơđăng lơh glài kràñ.

Ea Súp là kơnhoàl lơh kòi dờng ngan rlau jơh càr Dăk Lăk dê bal mờ 8 rbô lồ tàm kàl mrềt prang do. Tài bơh bơtơ̆t rbòng dà niam, uă ngan cau lơh broă sa tàm kơnhoàl lơh kòi 3 kàl pah nam, tơngai tam yah lơyah ngan. Bal mờ hơ̆ tai, trồ tiah nam do tàm Ea Súp krơi is ngan mờ bè ờs, mờ bơta duh ờ uă, tơngai dùl êt, mìu uă rlau mờ ală nam. Do ndrờm là ală jơnau lơh gơguh jơnau pơhìn digơlan ñui pơn jăt gam gơdram wơl tàm tiah ù, lơh aniai ai kàl pơn jăt tai bơh kơnhoàl dê in. Cau lơh broă sa, gơnoar ătbồ ală kâp mờ ală anih lơh broă geh gơrềng tàm kơnhoàl gam pơn jăt tai lơh ală broă lơh dipal nàng gờñ kơryan kòp, nàng lơh geh cồng nha mờ bơta niam ai tờm kòi in, do là phan lơh geh priă jền tờm bơh cau lơh broă sa tàm kơnhoàl do dê.

Cau cih VOV Tây Nguyên- Cau mlàng Lơ Mu K’Yến