Kơnhoàl Kon Plông, càr Kon Tum geh trồ tiah ai pà ală bơta niam ngan den tàng trồ tiah tàm do gơ kờñ ngan mờ uă bơta chi tam geh cồng nha lơh sa uă. Mơya tơnơ̆ rlau 15 nam geh càr Kon Tum git nền là tiah lơh sa gơn kơnờm, mìng is gơ wèt mờ gah lơh sa suơn sre, kơnhoàl kung ờ hềt lơh gơs phan bơna tac bro jat broă lơh dờng nàng geh tac uă tàm drà kă bro. Ồng Đặng Quang Hà, Củ tịc Ủy ƀan Ñân zân kơnhoàl Kon Plông đơs song, tài bơh ờ hềt lơh gơs phan bơna tac bro jat broă lơh dờng, tơnguh bơta kuơ gơguh uă den tàng bulah geh tus rlau 20 rbô lồ ù lơh sa suơn sre mờ kung neh lơh gơs tiah lơh sa mờ suơn sre ngui kông nghệ kao; tiah tam biap, bơkàu, kơnuh, plai chi tiah mrềt mờ kờp jơh bă ù rlau 1 rbô 500 lồ mơya cồng nha lơh sa tàm gah do bơh kơnhoàl dê gam ờ hềt uă: “Priă lơh geh bơh lơh sa suơn sre bơh kơnhoàl Kon Plông dê tŭ do mìng geh mờr 770 tơmàn đông tàm priă jền lơh geh bơh ală phan bơna tàm gùt kơnhoàl dê. Bè hơ̆ bulah geh bơta pràn bơtàu tơnguh lơh sa suơn sre dờng ngan mơya gah lơh sa suơn sre ờ hềt ngan ngồn dipal mờ bơta pràn gam geh tŭ do. Ƀan Thường vụ Tỉñ ủy, Ủy ƀan Ñân zân kơnhoàl neh tơrgùm đơng lam, ai tơlik Nghị quyết bè bơtàu tơnguh lơh sa suơn sre bulah neh lơh geh cồng nha mơya ngan ngồn nàng git nền bơta kuơ bơh gah lơh sa suơn sre kơnhoàl Kon Plông dê den jat bol hi ờ hềt dipal mờ bơta pràn he dê”.

Tus Kon Plông tŭ do, làng bol kung bè nac nhơl chờ gơtùi sa, ñô uă bơta phan bơkah tàm do, bè: piang phe pơr hê, sâm dây, kơphe Arabica, tiêu brê… hơ̆ sồng ală bơta biap, bơkàu, kơnuh, plai chi tiah mrềt. Bulah bè hơ̆, jơh ală phan lơh gơs bơh suơn sre kơnhoàl dê tŭ do kung gam tàm broă lơh sa dềt, rah rài lơm, ờ tơl nàng tac jat ală sră pơrgon blơi phan uă. Ồng Phạm Thanh, kwang atbồ anih tờm broă drơng ala lơh sa suơn sre kơnhoàl Kon Plông pà git, tŭ do, ală mpồl lơh sa kă bro bơcri priă tàm gah lơh sa suơn sre tàm kơnhoàl Kon Plông gam geh git nđờ jơt bơta phan bơkàu, biap, kơnuh, plai chi tiah mrềt mơya ờ hềt gơtùi gơ gơs phan bơna tac bro tài bơh broă lơh sa gam dềt, rah rài. Ồng Thanh đơs là neh tus tŭ, broă lơh sa suơn sre kơnhoàl dê ờ gơtùi pơn drờm bal mờ jơh ală bơta chi tam: “Nàng gơ gơs phan bơna tac bro dờng den mờr tus geh lơh bal mờ ală mpồl lơh sa kă bro tàm tiah lơh sa suơn sre nàng lơh gơlik phan bơna tac tàm drà kă bro geh kơ̆ kơljap. Wèt tus tơrgùm tàm 2, 3 bơta phan bơna tờm ngan ờ di uă bè tŭ do tai den kal ke nàng gơ gơs phan tac bro dờng”.

Iat jơnau đơs bơh ală cau jak chài, cau atbồ dê, Ủy ƀan Ñân zân kơnhoàl Kon Plông git nền, nàng bơtàu tơnguh phan lơh gơs bơh suơn sre jat gùng dà lơh gơlik phan bơna tac bro, tơnguh bơta kuơ gơguh uă den pal đal git wơl bơta chi tam mờ lơh gơs tiah mờng tam phan jat broă lơh dờng. Tềng đap mat, kơnhoàl geh tam tai 500 lồ kơphe tiah mrềt Arabica, tơnguh bă ù tam bơta chi tam do tus 1 rbô 500 lồ; lơh gơs tiah tam ce tiah đah mat tơngai lik Trường Sơn mờ 500 lồ tàm xã Hiếu mờ Pờ Ê; tam, sền gàr mờr 500 lồ tiêu brê…. Bal mờ hơ̆ là lam lơh bơt bơtàu mat kă bro mờ yal ù tiah lơh gơlik ai ală phan lơh gơs bơh suơn sre do in.

Lam lơh jat mùl màl ală jơnau kờñ ai tơlik, tŭ do, anih tờm broă drơng ala lơh sa suơn sre kơnhoàl Kon Plông gam pơgồp bal mờ mpồl lơh sa kă bro nàng ờng sơntìl 2 bơta chi tam là ce mờ kơphe Arabica nàng pà làng bol in. Gơnoar atbồ ală xã geh git nền bơtàu tơnguh tiah tam phan kung neh mblàng yal bè gùng dà, broă lơh kơnhoàl dê tus làng bol, mờ kung lam lơh ală broă lơh ngan ngồn nàng bơtàu tơnguh lơh sa. Ồng Nguyễn Văn Bay, Phó Củ tịc Ủy ƀan Ñân zân xã Đăk Tăng kơnhoàl Kon Plông pà git, gơnoar atbồ xã gam lơh ngan pơlam làng bol sơngka sền gàr niam 140 lồ kơphe tiah mrềt gam geh tŭ do, mờ kung geh broă rơndap lơh rề ơnàng tai bă ù tam chi tam do: “Xã tơrgùm mblàng yal hòi jà làng bol gàr gơtùi bă ù tam kơphe tiah mrềt. Git nền bơta pràn bè hơ̆ xã kung neh dan mờ Đảng ủy ai tơlik dùl Nghị quyết nàng bơtàu tơnguh 2 thôn tam kơphe tiah mrềt gơtùi, hơ̆ là thôn Đăk Prồ mờ thôn Đăk Tăng. Bơh broă pơrjum hòi jà den làng bol neh ring bal mờ lơh jat”.

Nàng lơh gơtùi jơnau kờñ bơtàu tơnguh lơh sa suơn sre jat gùng dà lơh gơlik phan bơna tac bro, tơnguh bơta kuơ gơguh uă, kơnhoàl Kon Plông, càr Kon Tum gam sơlơ tơnguh lơh bal đah làng bol mờ mpồl lơh sa kă bro. Mờ 2 bơta chi tam, geh: kơphe Arabica mờ tờm ce, kơnhoàl Kon Plông neh lơh bal mờ mpồl lơh sa kă bro hơ pơrgon dong kờl làng bol bơh sơntìl, priă bơcri, bơta chài tus broă blơi phan lơh gơs. Gơ wèt mờ 2, 3 bơta biap, bơkàu, kơnuh, plai chi tiah mrềt, kơnhoàl gam jơh nùs bal mờ mpồl lơh sa kă bro lơh broă mờ ală siêu thị, anih tac phan tàm uă càr, ƀòn dờng kĭ jơnau hơ pơrgon tac phan, bơh hơ̆ git wơl broă lơh, rơndap lơh sa gơ wèt mờ tơl phan bơna. Bè jŏ jòng, kơnhoàl Kon Plông geh rơndap tap sèng wơl gah lơh sa suơn sre jat gùng dà bơtàu tơnguh rài lơh sa suơn sre brê bơnơm kơ̆ kơljap, tơnguh bơta niam, bơta kuơ gơguh uă mờ bơta pràn tàm pơrlòng phan lơh gơs bơh suơn sre dê.