VOV4.K’ho - Ală ngai do, tàm 7 xã tiah nhàr dà lơgar càr Dăk Nông gam chờ hờp bơyai lơh Ngai chờ gùt làng bol sền gàr tiah nhàr dà lơgar nam 2022, hòi jà gal làng bol ală kòn cau kis tàm tiah do tus bal.

                                                     Dơ̆ đơs crih tamya tàm ngai chờ

Tàm “Ngai chờ” bal mờ ală broă lơh chài rơgơi đơs crih tamya geh uă bơta niam chài rơgơi kòn cau dê, ală kwang bàng neh tam pà bal broă mờng chài tàm broă lơh jăt ală broă pơrlòng tàm ală tiah bè “Broă làng bol tus bal sền gàr is gùng nhàr dà lơgar, ñjrong nhàr dà lơgar mờ sền gàr bơta lơngăp lơngai ờ do ờ dă tàm ƀòn, ƀòn tiah nhàr dà lơgar” “Broă pơrlòng “Gùt lơgar tus bal tài cau rơƀah, ờ lời cau lơi gơtìp sơbì is hờ tơnơ̆”, mờ ală broă lơh “Pơlam oh lòt bơsram”, “Kòn ròng pôs ling sền gàr tiah nhàr dà lơgar, “Lòt bal mờ cau ùr tàm tiah nhàr dà lơgar”... Tàm ngai chờ gùt làng bol sền gàr tiah nhàr dà lơgar geh bơyai lơh tàm xã Thuận An, Mpồl đơng lam ling sền gàr tiah nhàr dà lơgar càr Dăk Nông neh jào pà gai lòng lời kir “Tài gơnoar tờm ù tiah nhàr dà lơgar” bơh Mpồl đơng lam ling sền gàr tiah nhàr dà lơgar ai 1 nă cau geh uă broă pơgồp bal tàm broă atbồ, sền gàr gơnoar tờm ù tiah, bơta lơngăp lơngai tiah nhàr dà lơgar in.

Cau mblàng Ndong Brawl