VOV4.K’ho- Ngai 26/09, Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan, Phó Kwang atbồ Mpồl lơh broă sùm Mpồl đơng lam dà lơgar bè rcang sơndră trồ tiah lơh aniai bal mờ Mpồl lơh broă neh lòt sền broă lơh rcang sơndră mờ mìu càl rbŭt dờng dờng sồ 4 tàm càr Quảng Ngãi mờ lòt sền bơta kơ̆ kơljap tơnau dơng dà Phú Ninh, càr Quảng Nam.

Ƀộ trưởng ồng Lê Minh Hoan lòt sền broă rcang sơndră mờ mìu càl rơbŭt dờng sồ 4 tàm càr Quảng Nam

Ƀộ trưởng ồng Lê Minh Hoan neh lòt sền bơtơ̆t sơndră tơrlah Cửa Đại, ƀòn dờng Hội An, càr Quảng Nam mờ iăt kơno jơnau yal broă lơh rcang sơndră mờ mìu càl rơbŭt dờng bơh càr Quảng Nam dê. Ƀộ trưởng ồng Lê Minh Hoan jờng rơ uă ngan bơta rcang lài sơndră wơl mờ dơ̆ mìu càl rơbŭt dờng bơh càr Quảng Nam mờ Quảng Ngãi dê. Jat Ƀộ trưởng, ală càr do ndrờm geh 2 tiah pal sơndră mờ mìu càl rơbŭt dờng, hơ̆ là gah dà lềng pal kơlôi rcang kờp sền săp sèng ơhò, plung, ntrờn làng bol kŭp ka; ai tàm tiah kơh bơnơm den pal rcang ală bơta digơlan gơlik geh nàng sơndră wơl mờ dà dờng, dà croh gơguh tih, tơrlah bơnơm.

Bal mờ tiah tàm gùl lơgar, ală càr tàm tiah Tây Nguyên kung neh lam lơh ală broă lơh sơndră wơl mờ mìu càl rbŭt dờng sồ 4. Mho ngai 26/09, Duh broă sùm Tỉñ ủy Kon Tum bơyai lơh pơrjum mhar pờ tơn tàm internet mờ kâp ủy, gơnoar ătbồ bơh kâp càr tus kâp xã nàng ring bal gùng dà đơng lam, sồr lơh broă lơh rơcăng sơndră wơl mờ mìu càl rbŭt dờng.

Kon Tum pơrjum mhar rơcăng sơndră mìu càl rbŭt dờng sồ 4

Jăt mờ hơ̆, Duh broă sùm Tỉn ủy Kon Tum neh ring bal mờ jơnau sồr bơh Sở Giáo zụk mờ Đào tạo ai kơnòm bơsram in ơm rlô bơh ngai 27/09 tus tŭ geh jơnau yal pa. Ủy ƀan Ñân zân càr Kon Tum neh lơh 3 mpồl lòt sền, sồr lơh broă lơh rơcăng sơndră mìu càl rbŭt dờng tàm ală kơnhoàl geh pơhìn gơtìp aniai kơn jơ̆, geh: Kon Plông, Kon Rẫy, Ngọc Hồi, Đăk Tô, Đăk Hà, Tu Mơ Rông mờ Đăk Glei. Duh broă sùm Tỉñ ủy Kon Tum sồr ală kâp ủy, gơnoar ătbồ bơh càr tus xã pal kràñ cê kơ̆ dơn ntrờn làng bol lik dô jơh bơh ală tiah geh pơhìn uă bè tơrlah ù, dà kŏ dà cò; kràn cê kơ̆ nùs ờ lời làng bol lơi lòt rê gan ală tiah sơbơng roh tàm tơngai geh mìu dà tih.

VOV.VN - Cau mblàng K’Hạnh- Lơ Mu K'Yến