VOV4.K’ho- Rơcang ală broă lơh ai kơnòm dềt in tàm kàl rlô bơkang nam do, Tỉñ đoàn Dăk Lăk lam lơh uă broă lơh tơnguh pràn jak mờ bơta chài lơh broă ờs mờng ai mpồl kwang bàng đoàn in, ngan là tàm kâp hơ đơm. Mùl màl, Tỉñ đoàn Dăk Lăk neh bơyai lơh bơto pơlam bơta chài, mờng chài lơh broă ai kwang bàng đoàn, mpồl tàm thôn, ƀòn, tổ zân phố tàm càr.

Pơlam bơta chài ai mpồl kwang bàng đoàn in

Mờ uă tơngume bè ală bơta chài, bè: lam lơh nhơl chờ tàm dơ̆ pơrjum mpồl, mblàng yal bè broă lơh đoàn, mpồl bơh ală broă lơh pang mạng xã hội; đơs tềng đap uă cau mờ ală bơta chài pal geh bơh Ƀí thư Ci đoàn dê. Bal mờ hơ̆, Tỉñ đoàn Dăk Lăk gam pơn jat tai hòi jà bơta tă pơgồp bơh mpồl bơtiàn dê nàng lơh ală anih nhơl ñŏ kơnòm dềt in, lơh sàl rlô bơkang ai kơnòm dềt in. Pờ ală ơdŭ bơto bơsram niam chài kàl rlô bơkang wèt tus ală kơnòm bơsram tàm ală tiah kal ke, tiah sar lơgar ngài.

Cau mblàng K’Duẩn