Jat jơnau yal, 9 nhai nam 2023 lơh geh 6,87% jơnhoa ngan rlau jơh tàm tiah Tây Nguyên dê. Mơya bàr pe jơnau kờñ kwơ màng mìng lơh geh tàm khà lơyah lơm, ngan là bè: tă dia Dà lơgar pơgap 2 rơbô 400 tơmàn đong (ndrờm mờ 54,27%); ai priă bơcri dà lơgar geh rlau 1 rơbô 300 tơmàn đong, lơh geh pơgap 35% broă rơndăp lơh. Pơrjum neh tơrgùm cribơyai, sền sơ wì cồng nha neh lơh geh; sơñio loh bơta ờ hềt di pal, sền gĭt kơnòl bơh tơl nă kwang bàng Tỉñ ủy càr dê, cau lam bồ mờ mpồl cau, anih lơh broă, mpồl lơh broă, ală tiah gơwèt mờ ală bơta ờ niam, ờ pràn.

Jat ồng Dương Văn Trang- Ƀí thư Tỉñ ủy càr Kon Tum đơs: 3 nhai gam wơl broă ai priă là pal kràñ cê jơh nùs đơng lam, sồr lơh. Dilah ờ ai priă den lài ngan Mpồl đơng lam Đảng Ủy ƀan Ñân zân càr pal kong kơnòl broă. Kwang atbồ bồ Sở Kế hoạc mờ Đầu tư là anih lơh broă cribơyai dong kờl broă, sồr lơh ngan mờ dŭt ndơl là cau tờm bơcri priă lơh pal kong kơnòl broă bè broă do dê.