Lơh jăt jơnau bơto pơlam bơh Mpồl Tuyên giáo Dà lơgar dê, mho ngai 24/04, tàm ƀòn dờng Kon Tum, Mpồl lơh broă sùm Tỉñ ủy Kon Tum bơyai lơh Pơrjum tơn mờ pờ tơlik tàm internet mờ 12 anih tàm tơrbŏ bal tàm càr bơsram, kơlôi sơnơng, lam lơh jăt mìng tơngume bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê nam 2023 mờ pơrjum cíñ trị, bồ tơngoh bè jơnau cih bơh Tổng Ƀí thư ồng Nguyễn Phú Trọng dê.

Tàm Pơrjum cau yal jơnau bơh Tỉñ ủy Kon Tum dê yal wơl ală tơngume tờm bơh jơnau cih “Kràñ cê jơh nùs, kơ̆ dơn nùs nhơm tam dră, rơcăng sơndră sa kwề sa kwà, bơta ờ niam, pơgồp bơnah bơ̆t bơtàu Đảng mờ Dà lơgar he ngai sơlơ sàng goh, pràn kơldang kơ̆ kơl jăp” bơh Tổng Ƀí thư ồng Nguyễn Phú Trọng dê. Do là jơnau cih geh bơta kwơ tàm sră pơ àr mờ bơta geh ngan tàm rài kis kwơmàng gơwèt mờ broă lơh bơ̆t bơtàu Đảng, ală anih lơh broă cíñ trị mờ broă lơh kăc màng bơh lơgar he dê; là pang sră bơto pơlam kwơmàng tàm broă lơh tam dră, rơcăng sơndră sa kwề sa kwà, bơta ờ niam, broă tờm ngan nàng bơ̆t bơtàu Đảng mờ ală anih lơh broă cíñ trị ngai sơlơ sàng goh, pràn kơldang kơ̆ kơl jăp.