Gơ rềng tus dơ̆ ồs sa brê tam tờm ƀạch đàn tàm xã Hơ Moong, kơnhoàl Sa Thầy tàm ngai 7/03, lơh 2 nă cau tus bal gơ sơ̆t ồs chơ̆t, drim ngai 14/03, Cơl dŭ lơh broă Tỉñ ủy Kon Tum geh sră nggal pơ yoa Mpồl đơng lam Đảng Ủy ƀan Ñân zân càr in yal wơl jơnau đơs bơh Thường trực Tỉñ ủy dê bè broă do.

Jat hơ̆, Thường trực Tỉñ ủy Kon Tum jàu Mpồl đơng lam Đảng Ủy ƀan Ñân zân càr đơng lam mhar lùp sền, sền gĭt lơh loh jơnau tờm lơh gơbàn mờ lơh glài kơnòl broă bơh mpồl cau, cau dùl nă să geh gơrềng tus broă lời gơlik geh broă do. Cồng nha yal mờ Thường trực Tỉñ ủy in lài mờ ngai 25/3/2023.