Tàm dơ̆ tìp măt cribơyai, 2 gah jờng rơ ngan gơnoar broă bơh kơnhoàl ù tiah do dê mờ ală mpồl lơh broă bơh Asean dê tề lam. Thượng tướng ồng Hoàng Xuân Chiến đơs sùm, lơgar Việt Nam ờ tŭ lơi tam gơl gùng dà lơh broă mờ lơgar ndai krơi is, rơcăng lài is, ring lơngai mờ lơh bơyô bal; lơh bơyô mờ uă lơgar, lơh uă bơta gĭt gơ̆p mờ gùng dà broă lơh sền gàr dà lơgar “puan ờ”: ờ tus bal tàm mpồl tam klăc bal ling klàng, ờ lơh bal mờ lơgar ndai nàng dră wơl lơgar ne; ờ ai lơgar ndai in lơh pôs đồng ling klàng halà ngui ù tiah lơgar Việt Nam dê nàng dră wơl lơgar ndai; ờ ngui bơta pràn phan tam lơh halà pơhìn ngui bơta pràn phan tam lơh tàm gĭt gơ̆p dunia.

Tơngai tus, 2 gah pơn jăt tai lơh ngan sơlơ lơh broă bal, broă tờm tàm ală gah broă, pơn jăt tai lơh sir ală tơngume, gùng dà lơh broă bal; lơh pràn lơh broă bal bơto mpồl cau lơh broă, lơh broă bal đah mpồl ling dà lềng, ling rơndeh par bàr lơgar dê. Sơlơ lơh broă bal tàm ală gah broă geh jơnau tơl pràn bè lơngăp lơngai internet, tam gơl sồ, gah lơh sơnơm ling klàng, lơh sa mờ măy mok sền gàr dà lơgar, adat boh lam rài ătbồ. Thượng tướng ồng Hoàng Xuân Chiến ki ngàm jà kwang đơng lam bồ Ƀộ Quôk phòng lơgar Singapore bal mờ ală mpồl lơh sa kă bro lơgar Singapore tus lơgar Việt Nam tus bal Ràng tơlik Sền gàr dà lơgar Dunia lơgar Việt Nam nam 2024.