Tàm broă lơh, tàm nùs nhơm đềt mềr, ram mhŭ, ală kwang bàng neh tìp mat lơh kwèng mờ iat ală jơnau đơs, bơta kơp kờñ bơh ală cau bơsram dờng mờ ơruh pơnu jơi bơtiàn dồ êt nă cau, jat yàng geh pơn rơ jak dê. Do là ală cau geh bơta pơn rơ niam, geh uă cồng nha jak tàm bơsram sră, pơlam tàp kung bè sơn đờm mut lơh broă, sơn đờm lơh sa. Khi kung ala mat ơruh pơnu tàm ƀòn lơgar ai tơlik bè broă dong kờl gơ wèt mờ cau bơsram dờng, ơruh pơnu jơi bơtiàn dồ êt nă cau; kơp kờñ cau bơsram dờng, ơruh pơnu geh dong kờl ai càn priă cíñ sác, yal tơnggit jòi geh broă lơh.

Tàm broă lơh, ală kwang đơng lam bồ 2, 3 mpồl lơh broă kung neh cribơyai, yal tơnggit mùl màl rlau tai bè ală broă dong kờl, broă hòi jà, pơn jờng lời ai cau bơsram dờng mờ ơruh pơnu jơi bơtiàn dồ êt nă cau in, ngan là tàm bơto bơtê, broă lơh mờ lòt lơh broă hờ lơgar ndai. Tus bal broă lơh, oh H Saronny Arul, cau bơsram dờng gah bơta git gơp dunia, Học viện Ngoại giao đơs: “Ală broă lơh bè do den rơp lơh gơlik bơta gơn kơnờm oh in nàng bơsram niam rlau mờ lơh ngan pơlam tàp. Tài ală kwang đơng lam bồ neh đơs loh làng ngan là ală oh bơsram tĕ gơ in jak hơ̆ sồng rê wơl ndo, là dùl nă cau niam, là dùl gar sơntìl ndu gơnrơh mờ kuơmàng ai ƀòn dờng mờ ai càr he in. Tài tàm do gam uă ngan cau gam kơp ală bơta niam bè bol oh. Kơp kờñ là tơnơ̆ do rơp geh tai ală dơ̆ tìp mat nàng gơtùi pơn jờng nùs nhơm bơh ală kơnòm bơsram, cau bơsram dờng gam pơlam tàp mờ bơsram sră ngài hìu”.

Di dơ̆ do, Ủy ƀan Ñân zân ƀòn dờng Buôn Ma Thuột pà sră jờng rơ ai 8 nă cau bơsram dờng geh cồng nha bơsram jak ngan; Thàñ đoàñ ƀòn dờng Buôn Ma Thuột jờng rơ 11 nă cau bơsram dờng mờ 31 nă ơruh pơnu jơi bơtiàn dồ êt nă cau, jat yàng geh pơn rơ jak.  Ala mat kwang đơng lam bồ ƀòn dờng, ồng Trần Đức Nhật, Phó Củ tịc Ủy ƀan Ñân zân ƀòn dờng Buôn Ma Thuột kơp kờñ tơl nă cau bơsram dờng, ơruh pơnu jơi bơtiàn dồ êt nă cau rơp là dùl nă đại sứ lơh gơ rề uă bơta niam chài, rùp hin kòn bơnus mờ ù tiah Buôn Ma Thuột đơs is, càr Dăk Lăk đơs bal: “Kơp kờñ là ală bơyô geh jờng rơ tàm broă lơh do rơp là ală cau tờm ngan tă pơgồp uă rlau tai ai ƀòn dờng Buôn Ma Thuột in đơs is mờ càr Dăk Lăk in đơs bal tàm tơngai tus. Kơp kờñ là ală bơyô rơp là ală đại sứ, ală cau tờm, ală cau cèng bơta niam chài bơh yau, bơta niam krơi is bơh ƀòn dờng Buôn Ma Thuột dê tus mờ gơp bơyô tàm lơgar mờ bơdìh lơgar. Ală bơyô rơp là ală đại sứ geh pơn rơ jak nàng pơgồp bơnah bơt bơtàu rùp hin ƀòn dờng Buôn Ma Thuột- ƀòn dờng kơphe dunia dê, kung bè bơt bơtàu ƀòn dờng tơlir, ƀòn niam chài brê bơnơm, ngac ngar mờ cèng bơta niam chài”.

Đòm jat bơhiàn tam klac bal, kờñ gơboh dà lơgar bơh jơi bơtiàn Việt Nam dê, tơngai lài, ơruh pơnu jơi bơtiàn dồ êt nă cau mờ jat yàng ƀòn dờng Buôn Ma Thuột, càr Dăk Lăk neh ngai sơlơ lơh ngan, pơlam tàp mờ jơh nùs tă pơgồp tàm broă lơh bơt bơtàu mờ sền gàr dà lơgar. Ngai sơlơ geh uă ơruh pơnu jơi bơtiàn dồ êt nă cau bơsram tàm ală hìu bơsram đại họk, kao đẳng mờ Trung họk ờs mờng tàm gùt lơgar, tơnơ̆ tŭ lik klờng, uă cau bơsram dờng jòi geh broă lơh mờ at ală gơnoar broă tờm ngan tàm mpồl kwang đơng lam bồ Đảng, Dà lơgar mờ ală mpồl, gah broă lơh, mpồl cau ală kâp.

Uă ngan ală bơyô là ală cau bơsram jak, jơh nùs pơlam tàp, lơh ngan brồ guh tàm rài kis. Bơta do neh geh ai gŏ ngai sơlơ geh uă ơruh pơnu jơi bơtiàn dồ êt nă cau bơsram tàm ală hìu bơsram đại họk, kao đẳng mờ Trung họk ờs mờng tàm gùt lơgar, tơnơ̆ tŭ lik klờng, uă cau bơsram dờng geh rơndap ai broă lơh mờ at ală gơnoar broă tờm ngan tàm anih lơh broă Đảng, dà lơgar mờ ală mpồl, gah broă lơh, mpồl cau ală kâp; git nđờ rbô nă ơruh pơnu jơh nùs bơsram, lơh broă lơh sa, kă bro lơh pas ai să tờm mờ hìu bơnhă, mpồl bơtiàn in, pơgồp bơnah tơn jơh jơgloh tơrmù rƀah, tơnguh niam rài kis làng bol.