Thứ trưởng Ƀộ Giáo zụk mờ Đào tạo ồng Hoàng Minh Sơn pà git, tơngai pa do neh geh jơnau kơlôi rơcăng ngòt bè broă ờ tơl sră măi ơdŭ 4, ơdŭ 8 mờ ơdŭ 11. Geh bơta do dùl bơnah là tài bơh ală càr, ƀòn dờng tàm nam do rơwah sră lơyài, dùl bơnah tài broă kĭ giă sră bơh ală càr, ƀòn dờng dê. Mơya tus tŭ do, ală càr, ƀòn dờng neh kĭ tơl. Kwang đơng lam Ƀộ Giáo zụk mờ Đào tạo neh uă dơ̆ lơh broă mờ kwang đơng lam Hìu lip sră Giáo zụk Việt Nam nàng bơsong kal ke tàm dơlam is, rơcang nàng lip pang sră  măi mờ bè bơta tờm neh lơh gơs broă lĭp sră măi ală nam lài: “Mìng is gơwèt mờ sră măi ơdŭ 4, ơdŭ 8 mờ ơdŭ 11 là sră măi pa, tŭ do neh bơyai lơh pờ pơrlòng blơi mờ lơh jăt broă lĭp sră geh di pơgăp 80%. Gam di pơgăp 20% tàm tơngu me ală càr, ƀòn dờng neh yal tơl nàng Hìu lip sră Giáo zụk Việt Nam tơlik broă rơndăp lơh bơyai lip. Mờ pơn jăt tai geh lip gơs nàng di tŭ ai nam bơsram pa in, tơl sră ală mpồl ơdŭ 4, 8 mờ 11 in. Bè hơ̆ geh lơh gơs mờ tơl sră ai pe kấp bơsram in”.

Gơwèt mờ broă sền sơwì sră măi, gùng dà broă lơh gùt mpồl bơtiàn tus bal lơh sră măi, sền sơwì, lĭp sră măi là gùng dà broă lơh dờng neh geh ai tàm Nghị quyết sồ 88 nam 2014 bơh Quốk hội dê. Quốk hội khoă XIV kung geh Nghị quyết sồ 122, hơ̆ là tŭ lơh jăt broă sền sơwì cih sră măi jăt gùng dà broă lơh gùt mpồl bơtiàn lơh bal di lah geh dùl môn bơsram mùl màl neh lơh gơs ờ uă ngan sră măi geh sền nàng git, kĭ ai ngui den ờ geh sền sơwì sră măi ngui kes priă dà lơgar môn bơsram hơ̆. Tŭ do, jơh ală môn bơsram ndrờm geh sră măi lơm. Thứ trưởng ồng Hoàng Minh Sơn yal tai: “Dơ̆ do jơh ală ơdŭ neh geh kĭ (9 tàm 12 ơdŭ) ndrờm geh 3 pang sră măi. Ƀộ Giáo zụk mờ Đào tạo geh lơh nền nòn jăt Nghị quyết bơh Quốk hội-Nghị quyết sồ 122 dê. Tus do geh pơn jăt tai sền nàng git mờ kĭ 3 pang sră măi tai - do là 3 pang sră măi ơdŭ lồi kâp là ơdŭ 5, 9 mờ 12”.

Pơrjum dơ̆ 25 bơh Ủy ƀan Thường vụ Quốk hội dê gam geh bơyai lơh tàm Hà Nội neh bơyai lơh jăt sền jăt tơngu me “Broă lơh jăt Nghị quyết sồ 88 bơh Quốk hội khoă XIII mờ Nghị quyết sồ 51 bơh Quốk hội khoă XIV bè tam gơl pa jơnau bơto, sră măi bơto pe kấp”. Ủy ƀan Thường vụ Quốk hội sồr Ƀộ Giáo zụk mờ Đào tạo pal bơyai lơh sền sơwì là dùl pang sră măi tơl bơh ơdŭ 1 tus ơdŭ 12 geh 137 pang sră.

Bơh broă jăt sền pà gŏ, broă lơh bơto pe kấp nam 2018 geh lơh dờng, nền nòn, neh tam gơl bơh broă lơh tơrgùm bơto uă jơnau git wă tus mờ gùng dà broă lơh bơtàu tơnguh bơta niam, bơta pràn kơnòm bơsram dê; ai gŏ loh làng 05 bơta niam mờ 10 bơta pràn tờm ngan, kwơ màng pal bơtàu tơnguh gơwèt mờ kơnòm bơsram pe kấp dê. Tơngu me sră măi di pal mờ jơnau kờñ geh bơh Broă lơh bơto pe kấp pa dê. Broă sền sơwì cih sră măi neh hòi jà geh gal cau jăk chài, cau khoa họk, cau pơgru geh bơta ngăc ngar, pin dờn, mờng chài tus bal.

Broă tam gơl pa broă bơto bơtê mờ bơsram, sră măi là broă lơh kwơ màng, dờp geh bơta sền gròi uă ngan bơh cau tĕ khà bal mờ Làng bol dê. Jăt ală kwang bàng đơs, broă lơh sră măi bơto pe kấp geh nùs nhơm lơh jăt kơrnoăt sồr là di, mơya broă lơh do mìng geh ai tơngu me jơnau git wă. Den tàng tơngu me jơnau git wă pe kấp kung kwơ màng ngan, pal geh broă atbồ nền nòn bơh dà lơgar dê. Den tàng bè hơ̆, kờñ pal iăt kơno nàng geh broă lơh niam wơl nàng broă lơh sră măi geh lơh di mờ gùng dà geh ai. Ồng Đỗ Văn Chiến, Củ tịc Ủy ƀan Mặt trận Dà lơgar Việt Nam, đơs: “Broă pal lơh mơ là pal geh kơrnoăt sền gròi nền nòn bơh broă sền sơwì, lip, tăc sră mờ he pal tơmù giă sră măi di pal mờ rài kis bơh làng bol tŭ do dê. Làng bol gam dan là sră măi do pal geh Dà lơgar atbồ giă. Tam gơl he pal kơlôi tus. Tài di lah ai bơta lơi ală cau kal ke in den añ đơs là ai “akhar” là broă lơh jŏ jòng mờ kơl jăp ngan. Jơnau dan bơh Mpồl jăt sền dê là geh cơng tàng, geh tơngu me tờm lơh mơ ha là ờ den pal geh jơnau kơlôi sơnơng nền nòn mờ yal mblàng di pal”.

Củ tịc Quốk hội sồr mhar geh sră nggal bơto pơlam bè gùng dà broă lơh nền giă sră măi, lơh nền giă ờ uă ngan sră măi, gàr niam broă sền gròi nền nòn priă tă lơh, tơmù priă tă cau lơh kòn gùng, tơmù khà priă tơm priă càn lài nàng tơmù giă sră măi. Củ tịc Quốk hội sồr lơh jăt nền nòn tơngu me Nghị quyết sồ 88 bơh Quốk hội bè broă tam gơl pa broă lơh sră măi bơto pe kấp: “Nghị quyết sồ 88 geh cih: Ƀộ Giáo zụk mờ Đào tạo pal bơyai lơh sền sơwì là dùl pang sră măi geh tơl bơh ơdŭ 1 tus ơdŭ 12, tàm hơ̆ geh 137 pang sră. Ală mpồl lơh broă, ală cau ndai geh hòi jà sồr tus bal sền sơwì sră măi dùl ha là ờ uă pang sră jăt mờ bơta pràn, ờ pal sền sơwì tơl dùl pang sră măi. Jăt Nghị quyết sồ 88 geh ai là bè hơ̆. Nghị quyết sồ 122 là bơsong bơta gơ jal tŭ hơ̆ là ală pang sră lơi neh geh tàm drà kă bro đơs pơn dŭt bloh mờ kes priă ờ hềt di pal den dờp là ờ hềt sền sơwì sră măi hơ̆. Nghị quyết sồ 122 ờ gŏ di ờ dờp mờ ờ ala Nghị quyết sồ 88. Den tàng bè hơ̆ bơta mùl màl tŭ do tàm mpồl kwang bàng jăt sền đơs, añ gŏ kung gơlơh pal sền ngăc ngan, he pal kơlôi sơnơng rơlao tai”.