VOV4.K’ho - Pơrlòng sră ƀăo Dà lơgar nam 2021, Mpồl duh broă ai khà pơrlòng neh rơwah geh 152 jơnau cih mŭt tàm dar pơrlòng dŭt ndơl mờ geh jào 10 khà A, 22 khà B, 48 khà C, 35 khà pơn jờng ai ală cau geh jơnau cih jăk chài ngan in. Jăt jơnau đơs bơh ala măt mpồl duh broă ai khà pơrlòng sră ƀăo dà lơgar nam 2021, kàl pơrlòng dơ̆ do geh uă jơnau pơrlòng geh bơta tơngŏ, jơnau dră wơl uă, tơlik nùs nhơm jơh nùs, bơceh lơh, jòi nàng git, geh bơta pràn hòi jà, tơlik broă lơh jăk chài, niam, cèng geh nùs nhơm bơh sră ƀăo tàm rài pa dê. Geh ờ uă jơnau cih pơnrơ ngan geh ai uă ngan tơngai kơlôi sơnơng, cih nền nòn, tàm hơ̆ uă ngan là tơngu me jơnau cih gơrềng tus mờ kòp Kovid-19. Neh geh uă jơnau cih mùl màl, ngoh rơngăc ngan tus mờ nùs nhơm cau sền, ai tơngŏ broă ai nùs nhơm, să jan bơh cau ai jơnau tơngit, geh bơta tus bal uă tàm mpồl bơtiàn.

Jăt jơnau đơs bal, jơnau cih tus pơrlòng neh di pal mờ ală jơnau kờñ rơwah bơh Mpồl duh broă pơrlòng dê, yal tơl mờ nền nòn rài kis cíñ trị, lơh sa, bơta chài rơgơi, bơta lơngăp lơngai dà lơgar, lơh broă bal mờ lơgar ndai dà lơgar dê tàm nam 2021. Ală jơnau cih pơnrơ ngan geh broă ai tơngai cih nền nòn gơrềng tus mờ kòp Kovid-19, geh khà uă ngan tàm jơh ală bơta sră ƀăo. Uă jơnau cih geh khà uă ai tơngŏ broă ai nùs nhơm, să jan bơh cau lơh ƀăo dê mờ jơnau kờñ cèng wơl ală bơta mùl màl mờ niam bơnĕ, tŭp tus plai nùs bơh cau cau dê.

Pơrlòng dơ̆ do, Anih jơnau đơs Việt Nam lời wơl tềl kah niam bal mờ uă jơnau cih jăk ngan. Tàm hơ̆ geh 2 khà A, 2 khà B mờ 1 khà C. Bàr khà A gơwèt mờ ală jơnau cih “Ală ngai ờ huĭ” bơh mpồl cau cih jơnau Nguyễn Vũ Duy, Bùi Thị Thu Trang, Nguyễn Thị Minh Hạnh (Gah yal tơngit jơnau đơs-VOV1) mờ 4 jơnau cih “Tềng gah gùng lòt gam mùl màl ròng cau lơi”? bơh mpồl cau cih jơnau Trang Công Tiến, Phạm Trung Tuyến, Nguyễn Hữu Thịnh, Chu Trung Đức, Nguyễn Hải Bằng (đah VOV gùng lòt). Bàr jơnau cih geh khà B là “Dơ̆ tam dră bơh ală bơta ờ hềt geh” bơh mpồl cau cih jơnau Đinh Thị Thu Trang, Kiều Thanh Phượng, Nguyễn Thị Ánh Tuyết, Lê Phương Thảo, Phạm Thị Thu Trang (gah chài rơgơi mpồl bơtiàn –VOV2) mờ nhơl ƀài sa priă lơh pơrlồm tài bơh broă bơcri priă tàm kàl kòp gơtờp” bơh mpồl cau cih jơnau Nguyễn Sỹ Đoan, Nguyễn Phú Huân, Nguyễn Văn Tùng, Nguyễn Duy Bùi (Anih sơnđio rùp kỹ thuật số VTC).

Tàm hơ̆, jơnau cih geh khà A “Ală ngai ờ huĭ” bơh mpồl cau cih jơnau Nguyễn Vũ Duy, Bùi Thị Thu Trang, Nguyễn Thị Minh Hạnh-Mpồl tam klăc cau lơh ƀăo Anih jơnau đơs Việt Nam neh đơs di tus ală bơta pràn kơl dang ngan bơh dơ̆ tam dră mờ kòp Kovid-19 dê, mơya geh ai tơngŏ tàm dùl bơta krơi is, bơceh lơh. Hơ̆ là jơnau cih tơlik loh bơta pràn bơh jơnau đơs dê, ngui săp ntas tàm tiah geh tus, teh jơnau đơs crih, tàm hơ̆ uă ngan là broă lòt tus bơh cau ai cih jơnau tơngit dê, ờ ngòt kal ke tŭ tus tàm tiah tờm gơtìp kòp bè Bạch Mai, ƀòn dờng Hồ Chí Minh... Ala măt mpồl cau cih jơnau tơngit, cau lơh ƀăo Bùi Thị Thu Trang (VOV1) pà git: Nàng geh jơnau tơngit niam, mùl màl, lơh geh jơnau ngoh rơngăc cau iăt tàm bơta kòp gơtờp gơtìp kal ke, broă gơrềng ờ niam, jơh ală cau, broă lơh, jơnau cih bơh mờr bàr nam gùt lơgar lơh ngan tàm dră mờ kòp Kovid-19 (2020-2021), mpồl cau cih jơnau do neh cih gơs jơnau pơnrơ geh nùs nhơm bơh cau ai tơngit jơnau đơs Dà lơgar dê, mờ jơnau cih, mờ săp đơs, jơnau teh jơnau đơs crih, ai di, niam mờ geh nùs nhơm pa, mờ ală jơnau yal geh bơta lam sồr, bơto bơtê rơnàng tơnơ̆ do in-Tŭ geh iăt wơl jơnau cih do. “Pal đơs ngan, di lah tàm bơta bè ờs, broă cih jơnau là geh lơh tus tơn, den mờ jơnau cih do, mpồl 3 nă cau-dùl nă là F0, ơm tàm tiah tờm gơtìp kòp uă ngan tàm ƀòn dờng Hồ Chí Minh, dùl nă cau là cau lơh ƀăo Nguyễn Thị Minh Hạnh, bàr nă cau gam tai là cau lơh ƀăo Nguyễn Vũ Duy-Kwang atbồ gah yal tơngit, VOV1 mờ añ là Bùi Thị Thu Trang, geh tus 4 dơ̆ pal tam cah is gah lơh sơnơm jăt kơrnoăt geh ai, den tàng ală broă cri bơyai bơh mpồl dê ndrờm geh ngui uă ngan kỹ thuật số. Kal ke, tơlòng kung là bơta tơngŏ niam-pal kah ngan bơh mpồl cih jơnau “Ală ngai ờ huĭ” dê”.

Nam 2021, kòp Kovid-19 gơtờp wơl, lơh kal ke bè broă lơh, bơta rềs àr mơya kung cèng geh ală bơta niam nàng ală cau lơh ƀăo in tàm broă ai nùs nhơm, să jan tàm gah kal ke bơh rài kis mpồl bơtiàn, tơmù ală kal ke, ngòt rơngơ̆t nàng geh tus tàm tiah gơtìp kòp, mờ lòt lơh broă bal mờ mpồl kwang bàng cau lơh sơnơm, ƀák sĩ, ală mpồl lơh broă tàm tiah sơnrờp tam dră mờ kòp gơtờp. Jăt ồng Phạm Mạnh Hùng, Phó Kwang atbồ dờng, Củ tịc Thường trực Mpồl tam klăc mpồl cau lơh ƀăo Anih jơnau đơs Việt Nam đơs, ală jơnau cih bơh ală cau lơh ƀăo tàm Anih jơnau đơs Việt Nam geh khà pơrlòng sră ƀăo Dà lơgar nam 2021 tơrgùm tàm ală broă gơlik geh uă ngan. Hơ̆ là dơ̆ tam dră mờ kòp Kovid-19, lơh jăt Nghị quyết Pơrjum dờng Đảng nàng sền gàr bơta tờm nùs nhơm, bồ tơngoh bơh Đảng... Bơh ală bơta kal ke tài bơh kòp Kovid-19 lơh gơtờp, neh lơh mpồl cau cih jơnau tơngit tàm Anih jơnau đơs Việt Nam dê geh ai tơngŏ bơta ngăc ngar ndrờm bal nàng lơh broă tàm ală tŭ, ală bơta, ngui jơnau git wă sră ƀăo pa tàm bơta tờm uă bơta phan, ai geh uă jơnau cih sră ƀăo niam, yal niam bơta mùl màl geh kung bè ală bơta moăt, jê yan, hoàc huơr bơh làng bol dê. “Broă geh uă jơnau cih mờ tơl ală bơta geh mŭt tàm dar pơrlòng dŭt ndơl neh ai gŏ bơta tơl làm, uă bơta bơh mpồl cau lơh ƀăo uă bơta tàm VOV dê, tàm jơh ală bơta sră ƀăo. Do kung là broă ai tơngŏ gùng dà, broă bơ̆t bơtàu dùl anih sră ƀăo uă bơta phan geh khà dà lơgar – anih lơh sră ƀăo tờm Dà lơgar dê là di pal ngan. Uă nam do, he neh bơcri priă mờ tŭ do neh tơnhào geh ală cồng nha loh làng ngan. Cồng nha bơh dơ̆ pơrlòng sră ƀăo dơ̆ do geh pơnyờ să ngan bơh mpồl cau lơh broă VOV dê”.

Tơmŭt să bal, tŭ lơi kung rơcang geh tus tàm ală tiah glar bòl ngan, geh tŭ rềp mờ bơta chơ̆t jê, jơnau cih “Nhàr” bơh mpồl cau cih jơnau Tạ Quỳnh Tư, Kiều Viết Phong, Mpồl tam klăc cau lơh ƀăo Anih sơnđio rùp Việt Nam, geh khà A bơta lơma tài liệu neh gơlik uă ngan dà măt bơh cau sền dê bal mờ ală rùp mùl màl ngan. Cau sền gơtùi gŏ loh làng ngan bơta phi să bơh ală cau ai jơnau tơngit, cau lơh ƀăo nàng lơh gơs lơma do. Cau lơh ƀăo Tạ Quỳnh Tư, Anih sơnđio rùp Việt Nam, ala măt mpồl cau cih jơnau geh jơnau đơs: “Khà pơrlòng do lơh añ kah tus ală cau gơtìp kòp Kovid-19, tàm hơ̆ uă ngan là ală y, ƀák sĩ tàm dơ̆ tam dră cui rơcai ngan do, ală cau do neh ai añ in ală jơnau bơsram bè rài kis, broă sền kwơ rài kis mờ kis tài mpồl bơtiàn. Bơh tŭ lơh jăt broă lơh sră ƀăo mờ sơn đờm lơh lơma tài liệu den añ sùm kơlôi, lơh broă di là lơh geh bơta kờñ gơboh, lơh broă ờ di là lơh gơlik ală bơta ờ niam den tàng añ ngòt ngan tàm broă ai să tus bal tàm ală tơngu me mờ añ đơs là geh pơrlai nùs nhơm ndơ̆p geh tàm tơl nă cau lơgar Việt Nam he dê”.

Jăt cau lơh ƀăo Nguyễn Đức Lợi, Phó Củ tịc Mpồl cau lơh ƀăo Việt Nam đơs, tàm 2 nam bơh nam 2020 tus 2021, tềng đăp mờ bơta kal ke bơh kòp Kovid-19, geh uă cau cih jơnau tơngit, cau lơh ƀăo bơh ală anih yal tơngit, sră ƀăo neh ai nùs nhơm, să jan tus tàm ală tiah ngòt rơngơ̆t, geh tŭ gơtìp mờ gùng nhàr bơh bơta kis mờ bơta chơ̆t. Bơh tàm bơta khin cha jăk chài, khin kơlôi, khin lơh bơh mpồl cau lơh sră ƀăo neh ai geh uă broă ờ niam lik gŏ mùl màl, geh anih lơh broă geh gơnoar tus bơsong. Hơ̆ là jơnau cih geh bơta niam bơnĕ ngan bơh cau lơh ƀăo dê pal geh lơh uă pràn kơl dang: “Ală jơnau cih geh bơta ngòt rơngơ̆t, geh bal tàm broă rơcang sơndră mờ kòp gơtờp den he pal ai să jan mờ nùs nhơm bè hơ̆. Mơya geh bal tàm dơ̆ tam dră mờ sa kuề sa koà, tam dră mờ ală bơta ờ niam den he gơtùi đơs là geh uă bơta ờ niam di gơlan tus, geh broă pơhìn, geh tŭ là geh ală bơta pơhìn tus mờ màng kis bơh să tờm cau lơh ƀăo kung bè cau tàm hìu nhă cau lơh ƀăo. Bol añ kơlôi, ală cau lơh ƀăo pal rơcang lài bơta ngăc ngar, lài jơh là pal rơcang lài ai să tờm in ală jơnau ngăc ngar bè adăt boh lam. Ngan là cau lơh ƀăo mờ ờ ai nùs nhơm, să jan, ờ khin cha jăk chài mờ lòt tus tàm bơta dŭt ndơl bơh broă gơlik geh, bơh jơnau gơlik geh, tàm hơ̆ uă ngan là tàm broă tam dră mờ sa kuề sa koà den he ờ gơtùi geh ală jơnau cih niam mờ kung ờ geh jơnau cih geh nùs nhơm tàm pơlam sơl”.

Nàng gơtùi ai să jan, nùs nhơm bơh să tờm dê, ală cau lơh ƀăo sùm geh dùl nai plai nùs kờñ gơboh mờ broă lơh, plai nùs neh lam sồr ală cau lơh ƀăo bè broă lơh nàng lơh tus dŭt ndơl broă gơlik geh, pơgồp bal tàm broă lơh mpồl bơtiàn niam bơnĕ rơlao, di mờ nùs nhơm bơh ală cau lơh ƀăo kăc màng dê-hơ̆ là “Ai bơta niam, sơbì bơta ờ niam”.

Cau mblàng Ndong Brawl