Bơh lồi nam lài tus tŭ do, tàm kơnhoàl Dăk R’lấp, càr Dăk Nông, bơta kòl yal ai ù mờ broă drơng Hìu măy Alumin Nhân Cơ in gơlik geh tàm jơh ală gah broă, bơh tiah tơn hào quặng tus ală tiah mŭt lơh khoang sồ 03 bơh tơnau bŏ pơr hê mờ bơtơ̆t 02 tơnau pơ dơng bŏ tuh bơdìh tơnơ̆ tŭ săc rơ wah, rào goh. Ủy ƀan Ñân zân càr Dăk Nông neh lơh Mpồl lơh broă nàng bơsong ală bơta kal ke, bơta kòl yan tàm broă lơh bơh Kông ty Trà Dăk Nông (TKV), mpồl lơh broă atbồ mut lơh broă Hìu măy Alumin Nhân Cơ (hòi lơyah là Mpồl 1644).

Ồng Nguyễn Quang Tứ, Củ tịc Ủy ƀan Ñân zân kơnhoàl Dắk R’lấp, pà gĭt, mờ bơta đơng lam kràñ cê jơh nùs bơh Ủy ƀan Ñân zân càr mờ bơta pơgồp bal niam bơh ală Sở, ƀan, ngàñ, broă lơh ai ù nàng drơng Hìu măy Alumin Nhân Cơ in gam hời rơ hời geh tă bơsong. Ngan là, gơwèt mờ tiah lơh broă tơnhào bô-xít bơh nam dơ̆ 4 tus nam dơ̆ 6 (tơngai bơh nam 2020-2022) neh hòi jà geh 18 hìu bơnhă jàu ù mờ bă ù ơnàng pơgap 15 lồ; lơh sir broă jàu ù khoang sồ 02 tơnau bŏ pơr hê nàng lơh broă lơh bơ̆t kơ̆ kơl jap. Kơnhoàl gam bal mờ ală Sở, ngàñ, lơh ngan jơh nùs lơh niam sră nggal lam lơh broă bơt bơtàu 6 tiah ơm kis pa ai làng bol in. Ồng Nguyễn Quang Tứ đơs: “Ală phan lơh nàng drơng Hìu măy lơh sa in den kơnhoàl neh jàu ai TKV in là 15 lồ den tơl nàng mŭt lơh tus ngai 15/04 tus. Tŭ do geh 3 broă pal lơh là lơh gùng dà broă lơh rồn bơklơn 1 hìu bơnhă, sền gàr broă mŭt lơh 5 hìu bơnhă mờ hòi jà geh 17 hìu bơnhă den geh 13 lồ tai den rơ̆p geh bă ù ai hìu măy lơh broă tus ngai 1/06. Dơ̆ 3 là bă ù gam wơl bơh tiah mŭt lơh bơh nam dơ̆  7 tus nam dơ̆ 8 geh 77 hìu bơnhă mờ 73 lồ, tàm hơ̆ geh 40 hìu bơnhă ai tiah ơm kis pa den jat tŭ tơngai nhai 4 do kơnhoàl rơ̆p ring bal geh broă lơh 2 tiah ơm kis pa”.

Ồng Nguyễn Bá Út, Kwang atbồ Sở Kông thương càr Dăk Nông, Tổ phó Mpồl lơh broă 1644 bơh Ủy ƀan Ñân zân càr Dăk Nông đơs là, broă kal ke ngan rlau jơh tŭ do tàm Alumin Nhân Cơ là ù tiah mut lơh gơwèt mờ broă bơt bơtàu khoang sồ 03 tơnau bŏ pơr hê, gam 3 hìu bơnhă ờ dùl nùs bal kờp sền phan tam, phan geh tàm ù tiah dê. Broă bơt bơtàu bơtơ̆t tơnau ơn pơ dơng dà sồ 2 Hìu măy sac rơ wah quặng kung ờ hềt gơtùi mŭt lơh tài bơh gam 11 hìu bơnhă ờ hềt ntrờn. Càr neh sồr Ủy ƀan Ñân zân kơnhoàl Dăk R’lấp sơr băc mhar tơm bơh bơr mờ ală hìu bơnhă, sền sơ wì dong kờl bơtơl jat jơnau sồr, mờ geh broă lơh kràñ cê jơh nùs rlau tai. Ồng Nguyễn Bá Út đơs: “Tŭ do gam tơrgùm uă ngan tàm broă bơsong nàng geh phan lơh ai Hìu măy in, den mpồl lơh broă bơh chờm là neh di. Mơya geh ù tiah ai khoang sồ 03 den gam gơ kòl uă ngan, jơh bal mờ broă làng bol ờ bài kờp sền phan tam den pal geh broă lơh rồn bơklơn nàng kờp sền. Tiah do mờ ờ bơsong geh den bulah geh phan lơh den kung ờ gơtùi lơh ờ, sền bè hìu măy kung ơm lơh broă sơl”.

Bè broă tă bơsong ală bơta kal ke, kòl yan tàm tŭ lơh broă bơh Kông ty Trà Dăk Nông dê, jat ồng Lê Trọng Yên, Phó Củ tịc Ủy ƀan Ñân zân càr Dăk Nông yal, càr neh geh ală jơnau đơng lam ngan ngồn ai tơl Sở, ngàñ, Ủy ƀan Ñân zân kơnhoàl Dăk R’lấp in kung bè đah Kông ty Trà Dăk Nông. Ală anih lơh broă, mpồl lơh broă pal kràñ cê jơh nùs rlau tai, tơrgùm uă ngan nàng gơtùi lơh sir ală kơnòl broă geh jàu, gàr niam ai Hìu măy Alumin Nhân Cơ in lơh broă bè ờs, pơgồp bơnah kwơ màng tàm broă bơtàu tơnguh lơh sa- mpồl bơtiàn tàm tiah do in.