VOV4.K’ho - Ngai òr (04/03), tàm ƀòn dờng Phú Quốc, càr Kiên Giang, Ƀộ Ngoại giao lơgar Việt Nam bơyai lơh pơrjum tơn jơh 20 nam lơh broă wah mờ tồt ñjrong nhàr dà lơgar tàm ù gờl đah lơgar Việt Nam mờ lơgar Campuchia.

       Pơrjum bè broă wah mờ tồt ñjrong nhàr dà lơgar tàm ù gờl đah lơgar Việt Nam mờ lơgar Campuchia

Phó Thủ tướng Thường trực Cíñ phủ ồng Phạm Bình Minh tus bal pơrjum. Đơs tàm pơrjum, Ƀộ trưởng Ƀộ Ngoại giao ồng Bùi Thanh Sơn đơs là: pơrjum geh kwơ màng ngan nàng ai tơngŏ broă lơh gơs broă wah gùng mờ tồt ñjrong nhàr dà lơgar di pơgăp 84% gùng nhàr dà lơgar tàm ù gờl đah lơgar Việt Nam mờ lơgar Campuchia; tơn jơh, sền wơl mờ ai geh jơnau bơsram broă mờng chài tàm 20 nam lơh jăt broă cri bơyai wah nhàr, tồt ñjrong nhàr dà lơgar tàm ù gờl đah lơgar Việt Nam mờ lơgar Campuchia; mờ ai geh gùng dà broă lơh tiah nhàr dà lơgar tàm ù gờl đah lơgar Việt Nam mờ lơgar Campuchia tàm tơngai tus, tàm hơ̆ geh broă chồl pràn cri bơyai broă wah gùng nhàr, tồt ñjrong nhàr dà lơgar 16% gùng nhàr dà lơgar gam tai in.

Cau mblàng Ndong Brawl