VOV4.K’ho- Ngai 04/03, tàm ƀòn dờng Phú Quốc, càr Kiên Giang, Ƀộ Ngoại giao Việt Nam bơyai lơh pơrjum tơn jơh 20 nam lơh broă wah ù tiah nhàr mờ sơntơ̆p jrong nhàr lơgar tàm ù gờl đah Việt Nam mờ Campuchia nàng kờñ tơn jơh mờ sền wơl ală cồng nha cribơyai neh lơh geh. Pơrjum bơh Ƀộ trưởng Ƀộ Ngoại giao ồng Bùi Thanh Sơn đơng lam, ala măt kwang bàng đơng lam bồ ală Ƀộ, gah lơh broă dà lơgar mờ kwang đơng lam bồ 10 càr geh gùng nhàr lơgar tàm ù gờl mờ lơgar Campuchia tus bal. Ủy viên Ƀộ Cíñ trị, Phó Thủ tướng Thường trựk Cíñ phủ ồng Phạm Bình Minh tus bal mờ đơng lam pơrjum.

Đơs tàm pơrjum, Phó Thủ tướng Thường trựk Cíñ phủ ồng Phạm Bình Minh sồr Ƀộ Ngoại giao mờ ală ƀộ gah lơh broă dà lơgar bal mờ ală tiah geh gơrềng lơh jăt niam broă lơh ătbồ tiah nhàr lơgar, sền gàr kơ̆ kơl jăp gùng nhàr lơgar, ală jrong nhàr lơgar jăt ală sră nggal kơrnoat boh lam neh kĭ hơ, nàng kờñ pơgồp bơnah dong bơtàu tơnguh lơh sa- mpồl bơtiàn gơ jăt bal mờ sền gàr dà lơgar mờ lơngăp lơngai, bơ̆t bơtàu tiah nhàr lơgar đah 2 lơgar gơ gơs là kơnhoàl ù tiah ring lơngai, kơ̆ kơl jăp mờ bơtàu tơnguh jŏ jòng.

            Cau mblàng Lơ Mu K’Yến