Đơs tơn jơh dơ̆ Cribơyai do, Củ tịc Quôk hội ồng Vương Đình Huệ pà gĭt, Cribơyai neh geh 7 jơnau yal cih tă pơgồp jơnau đơs bơh ală cau jak dê tàm dơ̆ pơrjum bal mờ 2 dơ̆ pơrjum mìng dùl tơngume, rlau 40 jơnau cih bơh ală mpồl, cau mờng chài gah broă lơh do mờ cau jak dê. Tàm ală dơ̆ pơrjum mìng dùl tơngume mờ pơrjum bal kung bè cribơyai kwang bàng kâp dờng neh geh rlau 40 jơnau đơs tă pơgồp bơh ală cau mblàng yal, ală cau jak, ală mpồl lơh sa kă bro mờ cau ala măt tàm dơlam mờ bơdìh lơgar dê tus bal tàm lùp, tàm cribơyai tă pơgồp jơnau đơs bal mờ gơ̆p.

Cribơyai neh tam pà jơnau đơs bơh ală mpồl lơh sa kă bro dê bơh ala măt Ală mpồl Kă bro mờ Lơh sa mờ măy mok lơgar Việt Nam dê (VCCI), bơh ală Mpồl, bơh să tờm tơn bàr pe mpồl lơh sa kă bro tus bal Cribơyai dê; jơnau yal tơngĭt đah ală cau mờng chài gah broă lơh do dê tàm lơgar mờ lơgar ndai, cau mblàng yal jơnau, cau kơlôi sơnơng, cau rơndăp gùng dà broă lơh dong kờl mờ anih lơh broă lơh jăt gùng dà broă lơh dong kờl kung bè ală cau dờp lềng broă dong kờl. Cribơyai mùl màl neh gơ gơs là dùl anih tờm yal tơngĭt jơnau uă gah mờ tơl làm. Ală cau ala măt đơs uă tus bơta gơn kơnờm bơh bơta kwơ geh ngan bơh gơguh lơh sa tơlir dê mờ đơs nền do là gùng lòt ờ gơtùi pleh klàs, broă tờm sùm tàm gĭt nền ală gùng dà broă lơh, broă rơndăp lơh, broă dong kờl nàng wèt tus tơnguh uă bơta pràn tàm pơrlòng mờ gơguh lơh sa kơ̆ kơl jăp.