VOV4.K’ho - Drim òr (17/02), tàm ƀòn dờng Gia Nghĩa, càr Dăk Nông, Tổng Kông ty Tân Cảng Sài Gòn bơyai lơh pơrjum tơn jơh ing broă lơh jăt broă mblàng yal bè dà lềng, bồt dà lềng.

Tus bal pơrjum geh ala măt Tỉñ ủy, Ƀan Tuyên giáo 6 càr: Dăk Nông, Gia Lai, Kon Tum, Thanh Hoá, Bình Dương, Hậu Giang; ala măt Kụk Cíñ trị ling tàm dà lềng; Kwang đơng lam Tổng Kông ty Tân Cảng Sài Gòn; Anih lơh broă Cíñ trị Tổng Kông ty Tân Cảng Sài Gòn neh rơcang tus ală anih lơh broă, ală tiah bơyai lơh 12 dơ̆ mblàng yal bè dà lềng, bồt dà lềng, hòi jà geh 3 rơbô 200 nă kwang bàng, cau geh đảng, làng bol, kơnòm bơsram, cau bơsram dờng mờ git nđờ rơbô nă cau lơh ka. Broă mblàng yal bè dà lềng, bồt dà lềng bơh Tân Cảng mờ 6 càr neh geh tam gơl niam, di tŭ ai jơnau tơngit pơgồp bal tàm broă tơnguh jơnau git wă geh kơnòl mờ ai geh broă ring bal uă tàm gùt mpồl bơtiàn gơwèt mờ kơnòl sền gàr gơnoar tờm tiah dà lềng, bồt dà lềng dà lơgar dê.

Cau mblàng Ndong Brawl