Nam nhơl chờ dà lơgar 2022 neh geh rlau 210 jơnau niam chài, nhơl chờ geh lơh làm bă tiah tàm jơh gùt lơgar, tàm hơ̆, mìng is càr Quảng Nam bơyai lơh 73 jơnau, pơgồp bơnah lơh gơrề gơnoar broă mờ cồng nha bơh nhơl chờ dê gơwèt mờ rài lơh sa dà lơgar. Bulah năc dunia lòt nhơl tàm Việt Nam ờ hềt lơh geh bè jơnau kơ̆p kơnờm, mơya nam 2022, Việt Nam neh wă 3 tơlak 500 rbô nă năc. Kờp jơh năc tàm lơgar lòt nhơl kờp dŭ geh rlau 101 tơlak 300 rbô nă. Kờp jơh priă geh bơh nhơl chờ geh 495 rbô tơmàn đong. Jơnau đơs crih tam ya tàm dơ̆ bơyai lơh tơn jơh Nam Nhơl chờ Dà lơgar- Quảng Nam 2022 geh lơh jòng 90 phúk, yal tơngĭt jơnau đơs Quảng Nam- kơnhoàl ù tiah bềng bơhiàn niam chài, jơnau kah yau kăc màng, tam gơl pa...mờ uă bơta pràn, bơta geh brê bơnơm geh is, niam chài nàng bơtàu tơnguh nhơl chờ. Dơ̆ bơyai lơh tơn jơh là broă lơh tơn jơh ală jơnau Nam Nhơl chờ Dà lơgar nàng kờñ tơn jơh, sền wơl cồng nha bơyai lơh Nam Nhơl chờ Dà lơgar- Quảng Nam 2022; mơkung tàm jàu Bồng bi drơng lơh bơyai lơh Nam Nhơl chờ Dà lơgar- 2023 ai càr Bình Thuận in mờ tơngume “Bình Thuận- Bơtòm tơrgùm tơlir”.