Tàm do, Mpồl bơyai lơh neh jàu khà jờng dơ̆ pơrlòng “Kơnòm bơsram, cau bơsram dờng mờ nùs nhơm sơnđờm mut lơh broă” dơ̆ 5. Dơ̆ pơrlòng neh dờp geh 508 rơndap broă lơh gơwèt 5 gah broă: lơh sa mờ măi mok, mòn lơh phan bơna; lơh sa suơn sre, brê bơnơm, phan tàm dà: bơto bơtê, lòt nhơl, drơng broă, priă jền; lơh sơnơm, sền gròi pràn kơl dang să, kông nghệ lơh niam mờ lơh sa kă bro lơh geh bơta gơrềng mpồl bơtiàn. 80 rơndap broă lơh jak ngan geh mŭt tàm dar sac rơ wah mờ mŭt tàm dar lồi dŭt bơh dơ̆ pơrlòng dê.

Mpồl bơyai lơh neh jàu 80 khà jờng jat 2 khối pơrlòng kơnòm bơsram mờ cau bơsram dờng, tàm hơ̆ geh 10 khà dùl; 20 khà bàr, 30 khà pe mờ 20 khà pơn jờng. Mò Ngô Thị Minh, Thứ trưởng Ƀộ Giáo dục mờ Đào tạo kơ̆p kờñ ală kơnòm bơsram, cau bơsram dờng pơn jat tai lơh ngan lơh geh bơta kơ̆p kờñ bơh he dê, lơh sir ală rơndap broă lơh, gờñ crơng gơs mpồl lơh sa kă bro sơnđờm mut lơh broă, pơgồp bơnah lơh jat geh cồng nha broă rơndap bơh bơtàu tơnguh lơh sa- mpồl bơtiàn tơngai bơh nam 2021-2025.