VOV4.K’ho - Tơnơ̆ mờ 3 ngai lơh broă mờ nùs nhơm lơh tờm mờ nền nòn, drim òr (11/03), Pơrjum dờng kwang bàng ala măt cau ùr gùt lơgar dơ̆ 13 neh pơrjum tơn jơh. Pơrjum dờng neh pờ tê ring bal Nghị quyết Pơrjum dờng dơ̆ 13 Mpồl tam klăc cau ùr Việt Nam mờ tơngu me: Tơnguh bơhiàn, nùs nhơm tam klăc bal, bơceh lơh, rơcang tơrgùm bal, jơnau git wă tàm broă lơh tờm ală cau ùr; bơ̆t bơtàu mpồl lơh broă pràn kơl dang, tus bal bơ̆t bơtàu Đảng, bơ̆t bơtàu mpồl cíñ trị, sền gàr gơnoar mờ bơta kwơ di pal bơh cau ùr.

Lơh ngan tus nam 2030, tơnkah 100 nam crơng gơs mpồl tam klăc cau ùr  Việt Nam, ai tơngŏ bơngă mpồl lơh broă lam lài lơh broă tài nùs nhơm gơboh gơbài bơh cau ùr, geh gơrềng bal tàm tiah do mờ tàm dunia; pơgồp bal tàm broă lơh geh cồng nha jơnau kờñ tơnguh bơtàu dà lơgar. Nghị quyết kung ai geh khà broă pah nam dong kờl 33 rơbô 500 hìu geh cau ùr klàs mờ rơƀah, ndrờm mờ rơƀah; dong kờl tơnguh uă bơta pràn ai 17 rơbô nă cau ùr là cau tờm mpồl lơh sa kă bro, atbồ Hợp tác xã, cau tờm hìu kă bro; tus lồi tơngai lơh broă, lam sồr, dong kờl crơng gơs pa 350 Hợp tác xã geh cau ùr tus bal atbồ. Pah nam, tơl mpồl cau ùr lam sồr, dong kờl tai 5 hìu geh khà “hìu nhă 5 ờ, 3 kloh” ha là “hìu nhă 5 geh, 3 kloh”...

Cau mblàng Ndong Brawl