Tổng Ƀí thư, Củ tịc lơgar Lào ồng Thongloun Sisoulith mờ pơ ùr bal mờ Mpồl cau ala măt kwang bàng kâp dờng Đảng, Dà lơgar Lào neh ơn goàng bơkàu kah kơlôi Củ tịc Hồ Chí Minh, Cau khin cha chài dong klàs jơi bơtiàn, Cau niam chài jak ngan bơh Việt Nam dê. Goàng bơkàu bơh Mpồl dê cih sèng akhar: Củ tịc Hồ Chí Minh kis sùm tàm broă lơh kăc màng bol he dê.

Pơn jăt hơ̆, Tổng Ƀí thư, Củ tịc lơgar Lào ồng Thongloun Sisoulith mờ pơ ùr neh tus ơn goàng bơkàu, kah kơlôi ală Cau khin cha jak chài chơ̆t màng tàm Anih Kah kơlôi ală Cau khin cha jak chài chơ̆t màng. Goàng bơkàu bơh Mpồl dê cih sèng akhar: “Sùm sùm prăp kah sùm dà kơlhề tam lơh bơh ală cau ling kăc màng Việt Nam dê”.