Ală nam do, gĭt gơ̆p đah Việt Nam mờ Lào ngai sơlơ geh lơh pràn kơldang, bơtàu tơngguh jrô ơnàng, ngan ngồn mờ geh cồng nha tàm jơh ală broă. Bơh hơ̆, pơgồp bơnah kwơmàng tàm broă sền gàr kơ̆ kơl jăp cíñ trị, bơtàu tơngguh lơh sa- mpồl bơtiàn, sền gàr niam dà lơgar mờ bơta lơngăp lơngai tàm tơl lơgar dê, yờ tơngguh bơngă mờ gơnoar broă bơh bàr Đảng, bàr lơgar dê.

Dơ̆ lòt còp lơgar Việt Nam bơh Tổng Ƀí thư, Củ tịc lơgar Lào ồng Thongloun Sisoulith mờ pơ ùr dê là dơ̆ nàng kwang đơng lam bồ bơh 2 lơgar dê yal ai gơ̆p in gĭt bal bè broă tơl Đảng, tơl lơgar; cribơyai bè broă tàm tiah do mờ ală lơgar sền gròi bal; sền wơl cồng nha lơh broă bal đah 2 lơgar tàm tơngai do mờ geh gùng dà broă lơh, tơngguh uă cồng nha lơh broă bal tàm tơngai tus.