Tàm dơ̆ wă rò, ồng Nguyễn Trọng Nghĩa kung yal mờ Tổng Ƀí thư, Củ tịc lơgar Lào ồng Thongloun Sisoulith in bè cồng nha bơh Cribơyai Lý luận dơ̆ 9 đah bàr Đảng mờ đơs Cribơyai Lý luận dơ̆ 9 gơcèng bơta lý luận uă, lơh geh jơnau sồr ngan ngồn bơh tơl Đảng dê, ală tơngume cribơyai tơngŏ bơta jơh nùs jơh tồr, tơngume jrô ơnàng mờ sồr geh uă broă lơh geh ngan; đơs nền ală anih lơh broă kơlôi sơnơng lý luận bơh bàr Đảng dê rơ̆p pơn jăt tai pơgồp bal niam, sơlơ tàm yal tơngĭt bal jơnau lý luận, tàm yal tơngĭt bal bơta mờng chài nàng bal mờ gơ̆p lơh jăt geh cồng nha Kơrnoăt Pơrjum dờng bơh tơl Đảng dê. Tổng Ƀí thư, Củ tịc lơgar Lào ồng Thongloun Sisoulith jờng rơ cồng nha Cribơyai mờ kơ̆p kờñ tàm tơngai tus 2 anih lơh broă Mpồl mblàng yal gùng dà broă lơh Đảng dà lơgar, bàr Mpồl duh broă Lý luận dà lơgar pơn jăt tai pơgồp bal niam, sơlơ tàm yal tơngĭt bal jơnau, cribơyai ală tơngume is mờ tơngume jơnau kơlôi sơnơng bè lý luận, bồ tơngoh mờ mblàng yal drơng ai broă rơndăp gùng dà broă lơh jŏ jòng, broă lơh bơtàu kung bè cribơyai bơta mờng chài tàm ală tŭ bơ̆t bơtàu củ nghĩa xã hội tàm tơl lơgar dê.