Drim ngai 26/09, jăt jiơ Hà Nội, Tổng Ƀí thư, Củ tịc lơgar ồng Tô Lâm mờ Pơ ùr bal mờ mpồl cau ala măt kwang bàng kâp dờng lơgar he dê neh tus ƀlàng rơndeh par ală lơgar Jose Marti tàm càr lơgar La Habana, sơnđờm dơ̆ lòt còp lơgar Kộng hoà Cuba kâp Dà lơgar jăt jơnau jà bơh Ƀí thư Dơ̆ dùl Mpồl Duh broă Đảng Kộng sản dà lơgar Cuba, Củ tịc lơgar Kộng hoà Cuba ồng Miguel Diaz Canel Bermudez mờ pơ ùr dê. Geh lơh tàm tŭ bàr lơgar wèt tus tơngkah kir sơnrai 65 nam lơh gĭt gơ̆p cribơyai broă mờ lơgar ndai ngai 02/12/1960- 02/12/2025, dơ̆ lòt còp là cơng tàng tơnggŏ đơs nền bơta gĭt gơ̆p tam klăc ờs mờng bơh yau, lơh bơyô bal is ồn đah Việt Nam mờ Cuba neh mờ kung gam sùm geh sền là jơtài kwơmàng geh Đảng, Dà lơgar mờ Làng bol 2 lơgar jơh nùs bơ̆t bơtàu, mơkung tơnggŏ bơta sền dờng màng ngan bơh lơgar Việt Nam dê gơ wèt mờ lơgar Cuba mờ gơnoar broă bơh lơgar Cuba dê tàm broă lơh lơh broă mờ lơgar ndai bơh Việt Nam dê.

Digơlan tàm dơ̆ lòt còp, Tổng Ƀí thư, Củ tịc lơgar ồng Tô Lâm tus dơ̆ bơyai lơh wă rò ngan ngồn; geh ală dơ̆ pơrjum bơyai, tìp măt kâp dờng mờ ală kwang đơng lam bồ tờm ngan lơgar Cuba dê; pơdơng bơkàu tàm rùp mòn kah kơlôi Củ tịc Hồ Chí Minh mờ Cau khin cha jak chài jơi bơtiàn Cuba ồng Jose Marti, còp bàr pe anih lơh sa, tàm hơ̆ geh ală tiah geh ală rơndăp broă lơh lơh broă bal mờ bơcri priă bơh ală mpồl lơh sa kă bro lơgar Việt Nam dê; tìp măt mờ gơ̆p bơyô lơh bơyô bal mờ rơnàng kơnòm să bàr lơgar.