Tổng Ƀí thư, Củ tịc lơgar ồng Tô Lâm neh tus, còp să, pơndờm pơnđiang mờ pà phan ai làng bol gam ơm pồn pleh mìu càl rbŭt dờng tàm Hìu niam chài thôn Phú Thọ 1, xã Trường Sinh, kơnhoàl Sơn Dương, càr Tuyên Quang. Tổng Ƀí thư, Củ tịc lơgar ồng Tô Lâm kơ̆p kờñ làng bol tiah do pơn jăt tai tàm dong kờl bal bè ờs wơl rài kis. Pơn jăt hơ̆, Tổng Ƀí thư, Củ tịc lơgar ồng Tô Lâm neh să tờm tơn lòt sền ngan ngồn broă lơh rơcăng lài pleh mờ dà kŏ dà cò mìu càl rbŭt dờng broă bơ̆t àr glòm, bơ̆t kơ̆ wơl ală gơl àr, còp să, pơndờm pơnđiang ală mpồl tus bal sền gàr àr bơtơ̆t tàm tiah gơl àr bơtơ̆t dà dờng Lô tàm ù tiah kơnhoàl Sơn Dương. Đơng lam dơ̆ lơh broă mờ kwang đơng lam bồ càr Tuyên Quang bè broă lơh rơcăng lài pleh mìu càl rbŭt dờng dà kŏ dà cò tàm tiah do, Tổng Ƀí thư, Củ tịc lơgar sồr sùm lòt sền, bơsong tơn ală jơnau pơhìn gơbàn gơ wèt ală gơl àr bơtơ̆t, tơnau bơtơ̆t, rbàng brong; geh broă rơndăp lơh tam pà dà kŏ tàm ală tŭ digơlan gơlik geh bơta jal mhar nàng rơcăng lài ntrờn làng bol; lam lơh mhar ngan rlau jơh ală broă lơh dong kờl phan sa dà hùc.

Mang ngai 12/09, tàm ƀòn dờng Việt Trì, Tổng Ƀí thư, Củ tịc lơgar ồng Tô Lâm neh lơh broă mờ kwang đơng lam bồ càr Phú Thọ mờ iăt kơno ală jơnau sồr, jơnau dan bơh càr dê tàm broă bơsong jơnau gơlời wơl tài bơh mìu càl rbŭt dờng, dà kŏ dà cò lơh aniai.