Ngai òr (19/08), tàm Hìu pơrjum dờng Làng bol, càr lơgar Bắc Kinh, lơgar Lo, tàm dơ̆ tus còp kấp Dà lơgar tus lơgar Lo jăt jơnau jà bơh Tổng Ƀí thư, Củ tịc lơgar Lo ồng Tập Cận Bình, Tổng Ƀí thư, Củ tịc lơgar ồng Tô Lâm neh cri bơyai mờ Kwang geh jơng tàm Ƀộ Cíñ trị Đảng Kộng sản lơgar Lo, Củ tịc Anih duh broă Mặt trận dà lơgar Lo ồng Vương Hộ Ninh.

Tổng Ƀí thư, Củ tịc lơgar ồng Tô Lâm đơs nền Đảng mờ Dà lơgar Việt Nam sền kwơ màng broă tơnguh mờ bơtàu tơnguh bơta git gơ̆p mờ Đảng bal mờ Dà lơgar Lo, sền do là broă rơwah kwơ màng, ai lài ngan tàm broă lơh broă bal mờ lơgar ndai; lơgar Việt Nam lơh sùm broă “dùl lơgar Lo”, kờñ lơgar Lo bơtàu tơnguh dờng pràn, tơnguh gơnoar kwơ màng gơwèt mờ ring lơngai, lơh broă bal mờ bơtàu tơnguh tàm tiah do mờ tàm dunia. Ring bal mờ jơnau kơ̆p kờñ bal mờ jơnau kờñ lơh broă bal bơh Tổng Ƀí thư, Củ tịc lơgar ồng Tô Lâm dê, Củ tịc Anih duh broă Mặt trận dà lơgar Lo ồng Vương Hộ Ninh tơlik nùs nhơm lơgar Lo kơ̆p kờñ mờ rơcang lơh pràn broă tìp bal ală gah broă, ală kấp đah bàr lơgar dê; lơh pràn broă lơh bal mùl màl tàm ală gah broă, ngui gơnoar đơng lam tơrgùm bal bơh Anih duh broă sồr lơh broă bal đah lơgar Lo mờ lơgar Việt Nam.