Tổng Ƀí thư, Củ tịc lơgar ồng Tô Lâm đơs nền, broă bơsong jơnau gơlời wơl tài bơh mìu càl dờng Yagi lơh aniai là broă lơh mhar, jal mhar tàm tàm poh do mờ jơh ală gah lơh broă cíñ trị pal ai lài uă ngan.

Ƀộ Cíñ trị, Ƀan Ƀí thư tam pà bal mờ ală anih lơh broă, mpồl lơh broă, ală càr, ƀòn dờng, ală hìu nhă bal mờ ală làng bol gơtìp tài bơh mìu càl dờng lơh aniai, mờ jờng rơ Cíñ phủ, Thủ tướng Cíñ phủ, mpồl ling klàng, kwang àng, ală ƀộ, gah lơh broă dà lơgar neh ai jơh mpồl lơh broă nàng rơcang lài bơh gờñ bơh ngài gơwèt mờ mìu càl dờng sồ 03. Đơs tus bè ală broă lơh pal geh lơh mơ, Tổng Ƀí thư, Củ tịc lơgar ồng Tô Lâm sồr ală kấp, ală gah lơh broă pơn jăt tai tơrgùm uă ngan lơh jăt broă rơndăp lơh mờ gùng dà broă lơh nàng bơsong jơnau gơlời wơl bơh mìu càl dờng lơh aniai. Tàm hơ̆, pơn jăt tai lơh jăt ală mpồl lơh broă dong kờl cau gơtìp aniai, sơm ală làng bol mờ tŭ do gam gơtìp kơrian is, gơtìp aniai mờ jòi ờ gŏ, ngui ală phan lơh broă pa ngan nàng jòi sền ală tiah mờ tŭ do gam gơtìp kơrian is, jòi ờ gŏ tài bơh dà tih dà còp lơh tam cah is.