Drim òr (15/08), tàm Hìu lơh broă Đảng dà lơgar, di tơnkah 79 nam ngai Kăc màng nhai Phàm mờ Sơn tờm dà lơgar Kộng hoà xã hội củ nghĩa Việt Nam ngai 02 nhai 09, Ƀộ Cíñ trị bơyai lơh Pơrjum tìp măt ală kwang đơng lam bồ, kwang đơng lam bồ Đảng, Dà lơgar lài do nàng yal bè bơta bơh Đảng, bơh dà lơgar dê tàm ală nhai bồ nam 2024, kơnòl broă tờm ală nhai lồi nam 2024 mờ tàm tơngai tus.

Đơs tàm pơrjum, ala măt ală kwang đơng lam bồ Đảng, Dà lơgar, Tổng Ƀí thư, Củ tịc lơgar ồng Tô Lâm neh jơh nùs ưn ngài ală kwang đơng lam bồ, kwang đơng lam bồ Đảng, Dà lơgar lài do, Mặt trận Dà lơgar Việt Nam tus dơ̆ tìp măt geh kwơ màng do; dan pơyoa tus ală kwang đơng lam bồ lài do bal mờ hìu nhă pràn kơl dang, gơboh gơbài mờ ală bơta ndrờm niam bơnĕ. Tổng Ƀí thư, Củ tịc lơgar ồng Tô Lâm đơs nền, Ƀộ Cíñ trị, Ƀan Ƀí thư gam lơh ngan sồr tơrgùm đơng lam, gàr niam, lơh pràn, tơnguh pràn, gờñ lơh gơs cồng nha ală jơnau kờñ, jơnau geh ai, kơnòl broă mờ Jơnau lơh nền Pơrjum dờng dơ̆ XIII Đảng neh ai, ai lài bơsong kal ke, gơkòl bè gùng dà broă lơh, ai geh jơnau ƀuơn uă ngan ală broă lơh bè ờs tàm bơta adăt boh lam geh ai, pơgồp bal bơ̆t bơtàu Dà lơgar, tơnguh uă rài kis làng bol bơh mpồl lơh broă, cau dùl nă să bơh mpồl lơh sa kă bro tàm lơgar mờ lơgar bơdìh dê.