Jàu jơnau lơh nền mờ đơs tàm dơ̆ bơyai lơh, Tổng Ƀí thư, Củ tịc lơgar ồng Tô Lâm nting bơr gờm chờ 2 nă kwang bàng pa geh Ƀộ Cíñ trị pin dờn jàu broă, pồ, jàu kơnòl broă pa: ồng Trần Lưu Quang at gơnoar broă Kwang atbồ Ƀan Lơh sa dà lơgar mờ ồng Mai Văn Chính at gơnoar broă Kwang atbồ Ƀan Hòi jà làng bol dà lơgar. Tổng Ƀí thư, Củ tịc lơgar ồng Tô Lâm đơs nền, ồng Trần Lưu Quang mờ ồng Mai Văn Chính ndrờm là kwang bàng đơng lam bồ geh bơto bơtê wil tơl, sơn đờm lơh broă bơh kâp hơ đơm, neh geh tŭ at uă gơnoar broă, tus bal uă khoă Đảng dà lơgar, geh uă mờng chài ngan ngồn mờ mờng chài tàm broă lơh tă pơgồp jơnau đơs, đơng lam bồ, sồr lơh, lơh geh uă cồng nha kuơmàng tàm ală broă geh jàu broă drơng lơh.

Đơs tơnơ̆ tŭ dờp jơnau lơh nền, ồng Trần Lưu Quang mờ ồng Mai Văn Chính đơs nền, do là bơta pơn yờ să mờ kung là kơnòl lơh bè lơi nàng bal mờ Mpồl duh broă Đảng lơh gơs kơnòl broă geh jàu bal mờ dùl khà broă uă ngan lài mờ pơrjum dờng dơ̆ 14 bơh Đảng dê. Ồng Trần Lưu Quang mờ ồng Mai Văn Chính kơp kờñ, tàm gơnoar broă pa là Kwang atbồ Ƀan Lơh sa dà lơgar mờ Kwang atbồ Ƀan Hòi jà làng bol dà lơgar rơp pơn jat tai geh Đảng, Dà lơgar, kwang đơng lam bồ mờ kwang bàng đảng viên ală anih lơh broă Đảng dà lơgar sền gròi, dong kờl, pơgồp bal jơh nùs nàng bal mờ mpồl Duh broă Đảng lơh gơs jak ngan kơnòl broă tàm gơnoar broă pa.