Tổng Ƀí thư, Củ tịc lơgar ồng Tô Lâm đơs niam ngan ală tă pơgồp jơh nùs ngan bơh Kwang ătbồ ƀòn dờng Le Havre ồng Edouard Philippe lời ai gĭt gơ̆p lơh bơyô bal ờs mờng bơh yau mờ lơh broă bal uă bơta đah Việt Nam mờ Tây; chờ hờp tềng đăp ală bơta bơtàu tơngguh bơh bơta lơh broă bal đah ƀòn dờng Le Havre mờ Đà Nẵng, pơgồp bơnah sơlơ rề ơnàng tai lơh broă bal mờ ală tiah bơh lơgar Việt Nam dê tàm ală broă, bè: bơtàu tơngguh ală anih ơhò dà lềng ơm, logistics mờ jun pơndiang phan gùng dà lềng, sền gàr tiah ơm kis dà lềng, măy mŏk gùng dà lềng…

Kwang ătbồ ƀòn dờng Le Havre yal wơl ală kir sơnrai niam bơnĕ mờ gơlơh kah niam ngan bè khà bơtàu tơngguh pràn ngan bơh lơgar Việt Nam dê; kơ̆p kờñ sơlơ tơngguh tai lơh broă bal đah ƀòn dờng Le Havre mờ ală tiah bơh lơgar Việt Nam dê tàm ală broă: bơto bơtê, tề lam mpồl cau lơh broă jak, hòi jà mpồl lơh sa kă bro lơgar Tây dê lơh pràn bơcri priă tàm lơgar Việt Nam, is ồn là tàm ală broă bơta pràn bơh ƀòn dờng dê.