Tổng Ƀí thư, Củ tịc lơgar ồng Tô Lâm tơlik nùs nhơm niam nùs tềng đăp ală bơtàu tơngguh niam bơnĕ đah 2 lơgar dê; mờ đơs nền Việt Nam nđăp ngkời ờ tŭ lơi tam gơl hơ̆ là sùm sền dờng màng bơta gĭt gơ̆p tam klăc bal, lơh bơyô bal is ồn đah bàr Đảng, bàr Dà lơgar mờ Làng bol bàr lơgar dê. Tổng Ƀí thư, Củ tịc lơgar ồng Tô Lâm ưn ngài jơnau jà còp lơgar Cuba kâp Dà lơgar bơh Ƀí thư dơ̆ dùl, Củ tịc lơgar Cuba ồng Diaz-Canel dê, mờ tơlik nùs nhơm kơ̆p kờñ dơ̆ lòt còp rơ̆p lơh kơ̆ kơl jăp tai bơta pin dờn, kơ̆t kơnhăp rlau tai nùs nhơm tam klăc đềt mềr đah bàr jơi bơtiàn; tơngguh uă cồng nha lơh broă bal, ai gĭt gơ̆p đah Việt Nam mờ Cuba mŭt tus dồ tŭ tơngai pa, bơtàu tơngguh ngan mờ kơ̆ kơl jăp.

Ồng Orlando Nicolas Hernandez Guillen, Kwang ătbồ Anih lơh broă ala măt lơgar Cuba dê tơlik nùs nhơm ngoh rơngăc geh tìp wơl Tổng Ƀí thư, Củ tịc lơgar ồng Tô Lâm lài mờ dơ̆ lòt còp geh jơnau pơrya kah yau đah 2 lơgar dê tơn; mờ đơs nền Đảng, Dà lơgar mờ Làng bol Cuba sùm jăt sền mờ đơs niam ngan cồng nha lơh geh bơh mờr 40 nam tam gơl pa bơh bơta đơng lam bơh Đảng Kộng sản Việt Nam dê mờ lam bồ là Tổng Ƀí thư, Củ tịc lơgar ồng Tô Lâm dê.