Tàm sră pơyua, Tổng Ƀí thư pơyua tus ală sau là kơnòm pa tàu, kơnòm dềt Việt Nam tàm lơgar mờ tàm lơgar ndai, ală sau là cau lơgar ndai tàm Việt Nam ală nùs nhơm đềt mềr kờñ gơboh, ram mhŭ ngan rlau jơh tàm dơ̆ sa tềp Trung thu, sa tềp kơnòm dềt dê. Mờ, kơ̆p kờñ pah dơ̆ sa tềp Trung thu rơ̆p là ală jơnau kah kir lời wơl niam bơnĕ bơh rơnàng kòn se dê.

Tổng Ƀí thư kung pơyua jơnau tam pà bal kal ke mờ kơnòm dềt tiah dà tih: “Trung thu nam do ờ geh wil tơl tài bơh trồ tiah lơh aniai lơh gơlik ală jơnau gơlời wơl kơn kơ̆ ngan gơ wèt mờ uă hìu bơnhă, thôn, ƀòn, xã sơnah ƀòn. Uă sau kơnòm dềt ờ bơtuah gơtìp kơñau tĕ màng kis, uă sau chơ̆t cau pròc mhàm, roh hìu đam, kis tàm rài kis kal ke ngan. Wa dan pơyua jơnau tam pà bal bơta muăt jrùm jơh nùs ngan rlau jơh tus mờ cau pròc mhàm, hìu bơnhă ală sau là cau rềs àr bơh dơ̆ mìu càl rbŭt dờng dà tih dê mờ gơn kơnờm jơh ală bol he khin cha tĕ sơrlèt bơta jê sồt, roh rui do. Gơ wèt mờ ală sau tàm ală tiah mìu càl rbŭt dờng, tiah dà kŏ, Wa tơngkah ală sau pal sền ngăc sền gàr lơngăp lơngai tŭ bơsram sră, nhơl ñŏ. Pleh ngài tĕ ală tiah sơbơng roh, bañ nhơl rềp gah dà dờng, dà croh, tơnau dà, bơtơ̆t dơng dà, sùm kah dờ mè bèp, pơgru dê bơto tơngkah nàng sền gàr is să tờm mờ gơ̆p bơyô”.