Tàm dơ̆ tìp, Tổng Ƀí thư, Củ tịc lơgar ồng Tô Lâm tơlik nùs nhơm ưn ngài jơh nùs ngan Kwang ătbồ lơgar Mỹ ồng Joe Biden bè jơnau đơs tam pà bơta muăt jrùm uă ngan tềng đăp bơta sang rài bơh ƀồc ồng Nguyễn Phú Trọng, Tổng Ƀí thư Mpồl Duh broă Đảng Kộng sản dà lơgar Việt Nam dê mơkung ưn ngài bơta dong kờl di tŭ bơh Cíñ phủ lơgar Mỹ dê lời ai làng bol lơgar Việt Nam in tàm dơ̆ mìu càl rbŭt dờng pràn ngan Yagi pa do. Bàr nă kwang đơng lam bồ tơlik nùs nhơm chờ hờp tềng đăp ală cồng nha uă ngan lơh geh tơnơ̆ dồ nam lam lơh jăt gĭt gơ̆p Tam klăc lơh broă bal Jŏ jòng tơl làm, dipal mờ bơta kơ̆p kờñ mờ bơta kwơ bơh jơh bal 2 gah dê, pơgồp bơnah gàr sùm ring lơngai, kơ̆ kơl jăp, lơh broă bal, bơtàu tơngguh bơh kơnhoàl ù tiah do mờ tàm dunia dê.

Bè ală broă ală lơgar mờ kơnhoàl ù tiah do sền gròi bal, bàr nă kwang đơng lam bồ dồ nùs ring bal bàr gah pơn jăt tai sơlơ lơh broă bal tai tàm ală cribơyai kơnhoàl ù tiah do mờ ală lơgar, tàm hơ̆ geh tàm mpồl Asean, Tam klăc lơh broă bal Mekong mờ Mỹ, APEC, Liên hợp quôk…pơgồp bơnah tàm tơngguh tai tìp măt tơm bơh bơr, ring lơngai, kơ̆ kơl jăp, lơh broă bal mờ bơtàu tơngguh tàm kơnhoàl ù tiah do mờ tàm dunia.