Thủ tướng ồng Manuel Marrero Cruz tơlik nùs nhơm chờ hờp geh wă rò Tổng Ƀí thư, Củ tịc lơgar ồng Tô Lâm; đơs nền dơ̆ lòt còp bơh Tổng Ƀí thư, Củ tịc lơgar dê là broă geh gơtha kah yau tàm gĭt gơ̆p đah 2 lơgar. Tổng Ƀí thư, Củ tịc lơgar ồng Tô Lâm tơlik nùs nhơm sền dờng màng mờ jờng rơ ngan ală cồng nha mờ làng bol Cuba oh mi lơh geh tàm gùng lòt guh tus Củ nghĩa Xã hội tàm tŭ gam uă kal ke.

Tổng Ƀí thư, Củ tịc lơgar ồng Tô Lâm mờ Thủ tướng lơgar Cuba ồng Manuel Marrero Cruz neh cribơyai bè broă lơh broă bal đah 2 lơgar tàm tơngai lài. Bàr gah cribơyai jrô ală broă lơh nàng kờñ tơngguh uă cồng nha lơh broă bal đah Việt Nam mờ Cuba tàm ală broă; dồ nùs bal lơh pràn mờ tơngguh uă cồng nha lơh broă bal lơh sa, đơs sùm 2 gah pal pơn jăt tai sền gròi, lơh jăt niam ală rơndăp broă lơh lơh broă bal broă lơh sa sươn sre, kơlôi sơnơng gùng dà lơh broă bal pa geh cồng nha mờ kơ̆ kơl jăp.