Tàm dơ̆ tìp mờ Kwang atbồ lơgar Bulgary, Tổng Ƀí thư, Củ tịc lơgar ồng Tô Lâm đơs sùm lơgar Việt Nam sùm sền kwơ mờ kơ̆p kờñ tơnguh rơlao tai bơta git gơ̆p lơh broă bal uă gah broă mờ lơgar Bulgary; Đơs nền lơgar Việt Nam sùm git jơnau mờ kah sùm tus mờ broă dong kờl bơh làng bol lơgar Bulgary dê gơwèt mờ lơgar Việt Nam tàm broă tam lơh sền gàr bơta lơngăp lơngai dà lơgar lài do mờ bơ̆t bơtàu dà lơgar tŭ do.

Tìp Kwang atbồ lơgar Phần Lan ồng Alexander Stubb, Tổng Ƀí thư, Củ tịc lơgar ưn ngài Cíñ phủ mờ Làng bol lơgar Phần Lan neh dong kờl lơgar Việt Nam tàm tơngai kal ke lài do mờ rơhời bơtàu tơnguh, kung bè neh pơyoa jơnau còp să, pơn dờm Làng bol lơgar Việt Nam bơsong hoàc huơr bơh mìu càl rơbut dờng sồ 03 pa do. Tàm dơ̆ tìp mờ Kòn klao cau bơtau lơgar Kuwait ồng Sheikh Sabah Al-Khaled Al-Sabah, Tổng Ƀí thư, Củ tịc lơgar ồng Tô Lâm sồr bàr gah pơn jăt tai tàm pơgơl mpồl kấp dờng mờ ală kấp, lơh geh cồng nha ală gùng dà broă lơh bal. Lơgar Việt Nam tŭ lơi kung chờ gờm ală mpồl lơh sa kă bro lơgar Kuwait tơnguh broă bơcri priă tàm lơgar Việt Nam.