Tàm dơ̆ tìp, Tổng Ƀí thư, Củ tịc lơgar tam pà bal ală nùs nhơm kơlôi sơnơng, jơnau đơs bơh Kwang gơnoar cih Liên hợp quốk dê bè bơta tàm ală lơgar mờ ală bơta lòng uă bơta mờ dunia gam kong gơtìp. Tổng Ƀí thư, Củ tịc lơgar ưn ngài broă dong kờl pràn bơh ală mpồl lơh broă Liên hợp quốk dê tàm lơgar Việt Nam tàm broă rơcang pleh mờ rềs àr bơh trồ tiah.

Tổng Ƀí thư, Củ tịc lơgar sồr Kwang gơnoar cih Liên hợp quốk pơn jăt tai sền gròi lơh pràn ală gah broă bè tàm gơl năng lượng, tam gơl tơlir, tam gơl sồ, bơ̆t bơtàu mpồl atbồ sồ… tàm hơ̆, sền gròi tus bơta kwơ bơh ală lơgar gam bơtàu tơnguh, tàm hơ̆ geh lơgar Việt Nam. Ồng Antonio Guterres ưn ngài mờ đơs niam broă tus pơgồp bal bơh lơgar Việt Nam dê tàm ală anih lơh broă kwơ màng, kung bè tàm jơh ală gah broă lơh geh ai lài bơh Liên hợp quốk dê, tàm hơ̆ uă ngan là broă sền gàr bơta ring lơngai, lơh jăt ală Jơnau kờñ bơtàu tơnguh kơl jăp, rơcang pleh mờ tam gơl trồ tiah.