Jăt tàm bơta iăt kơno ală jơnau yal tơnggĭt ală jơnau tă pơgồp tàm dơ̆ cribơyai mờ tìp măt uă tập đoàn khà dùl, Tổng Ƀí thư, Củ tịc lơgar pà gĭt sền gŏ geh bơta pràn, bơta jơh nùs jơh tồr bơh ală mpồl lơh sa kă bro lơgar Mỹ dê nàng bal mờ gơ̆p chồl tơngguh rề ơnàng broă lơh lơh broă bal bơcri priă mờ lơgar Việt Nam tàm tơngai tus, mơkung kơ̆p kờñ mpồl lơh sa kă bro lơgar Mỹ dê pơn jăt tai lơh ngan brồ guh nàng gơgơs là cau bơcri priă dờng ngan rlau jơh tàm Việt Nam, ngui niam bơta ƀươn, ngui jơh ală tŭ niam jăt tàm bơta gĭt gơ̆p ring bal, ki ngàm bal mờ gơ̆p mờ 2 gah geh kwơ bal nàng ndrờm pal mờ bơta gĭt gơ̆p Tam klăc lơh broă bal jŏ jòng tơl làm đah 2 lơgar.

Nàng lơh geh jơnau kờñ hơ̆, Tổng Ƀí thư, Củ tịc lơgar sồr ală ƀộ, gah broă lơh kâp dà lơgar, anih lơh broă geh gơrềng bơh 2 lơgar dê pơn jăt tai lơh jăt ngan ngồn ală gùng dà broă lơh, pơlam gùng dờng bơh jơh ală tơnggume gĭt gơ̆p Tam klăc lơh broă bal jŏ jòng tơl làm 2 gah; di tŭ dong kờl, bơsong ală kal ke, bơta gơkòl bơh ală cau bơcri priă dê. Tổng Ƀí thư, Củ tịc lơgar kung kơ̆p kờñ Cíñ phủ lơgar Mỹ rơ̆p dong kờl, hòi jà mpồl lơh sa kă bro lơgar Mỹ tơngguh tai bơcri priă tàm lơgar Việt Nam, mơkung ai tơl bơta, pơn jăt tai dong kờl ală cau bơcri priă Việt nam in rề ơnàng lơh broă bơcri priă lơh sa kă bro geh cồng nha.