Drim òr (22/09), jat jơ tiah do, Pơrjum kwang bàng kâp dờng Tơnơ̆ do neh mut lơh yŭ rơyùm tàm Hìu lơh broă Liên hợp quôk tàm New York, lơgar Mỹ mờ bơta tus bal bơh gal ngan kwang đơng lam bồ kâp dờng ală lơgar, ală mpồl lơh broă ală lơgar mờ kơnhoàl ù tiah bal mờ cau ala mat ală Mpồl lơh broă ờ di cíñ phủ đơng lam, cau kơlôi sơnơng jak chài, priă jền mờ mpồl lơh sa kă bro. Tổng Ƀí thư, Củ tịc lơgar ồng Tô Lâm lam bồ Mpồl cau ala mat kâp dờng lơgar he tus bal pơrjum.

Đơs tàm pơrjum, Tổng Ƀí thư, Củ tịc lơgar ồng Tô Lâm pà git: Việt Nam jờng rơ ală sră nggal geh ring bal tàm pơrjum mờ kơp kờñ ală tơngume sră nggal dê rơp geh lam lơh jat jơh nùs geh cồng nha. Việt Nam kơp kờñ Liên hợp quôk mờ gơnoar broă lơh tờm, đơng lam pơgồp bal mờ ală mpồl lơh broă ală lơgar pơn jat tai geh ală tă pơgồp ngan ngồn rlau, geh cồng nha rlau, kràñ cê rlau tàm broă rơcang lài kơryan rềs àr gơwèt mờ bơta bơtàu tơnguh mhar, kơ̆ kơl jap mờ dunia dê bơh ngai do tơn. Việt Nam hơ pơrgon rơp tă pơgồp jơh nùs, geh cồng nha tàm ală broă lơh ngan bal nàng kờñ bơt bơtàu dunia ring lơngai, bơtàu tơnguh ring bal tài rài kis hờm ram, gơboh gơbài bơh kòn bơnus dunia dê.