Do là broă kwơmàng pơgồp bơnah sơlơ tơnguh tai mờ lơh jrô ơnàng rlau tai bơta gĭt gơ̆p lơh bơyô bal pơnrơ dờng ngan, tam klăc bal dờng màng ngan, lơh broă bal tơl làm đah 2 Đảng, 2 Dà lơgar mờ Làng bol 2 lơgar Việt Nam mờ Lào.

Tàm dơ̆ tìp măt, bàr nă Kwang đơng lam bồ đơs wih đơs wơl bơhiàn kah yau tam klăc đềt mềr, tàm dong kờl bal mờ gơ̆p; đơs nền gĭt gơ̆p đah lơgar Việt Nam mờ Lào là jơtài kas màng ngan bơh 2 jơi bơtiàn dê, là jơnau lơh nền ờ gơtùi pleh klàs, jơnau pal jăt kah yau mờ là bơta pràn dờng ngan rlau jơh bơh 2 Đảng, 2 Dà lơgar kờñ pal geh đòm jăt, tàm lời wơl ai ală rơnàng tơnơ̆ do in. Tổng Ƀí thư Nguyễn Phú Trọng, đơs nền: gĭt gơ̆p đah Việt Nam mờ Lào sùm gàr gơnoar broă kwơmàng krơi is ngan, là ai lài khà dùl tàm broă lơh lơh broă mờ lơgar ndai bơh Việt Nam dê; mơkung đơs sùm bàr pe tơngume tờm nàng kờñ sơlơ tơnguh tai gĭt gơ̆p đah 2 Đảng, 2 lơgar tàm tơngai tus.

Tàm Dơ̆ tìp măt, Thủ tướng Cíñ phủ Phạm Minh Chính mờ Thủ tướng Cíñ phủ lơgar Lào Sonsay Siphandone dồ nùs ring bal đơs là, 2 lơgar kờñ pal pơn jăt tai sơlơ tơnguh tai bơta tam klăc bal, lơh pràn broă lơh broă bal bè sền gàr dà lơgar- lơngăp lơngai mờ lơh broă mờ lơgar ndai; lơh gơlik bơta tam gơl pràn tàm lơh broă bal lơh sa; pơn jăt tai tam gơl pa, tơnguh uă cồng nha lơh broă bal tàm ală gah broă nàng kờñ sơlơ tơnguh rlau tai gĭt gơ̆p tam klăc dờng màng đah Việt Nam mờ Lào, tài bơta kwơ dipal mờ bơta geh ngan bơh làng bol tơl lơgar dê, tài ring lơngai, lơh broă bal mờ bơtàu tơnguh bơh kơnhoàl ù tiah do dê mờ tàm dunia dê.