Rơcang ai Pơrjum dờng Đảng gùt lơgar dơ̆ 14 in kờp dŭ bơyai lơh tàm nhai 01 nam 2026 tàm Pơrjum dơ̆ 8 Ƀan Cấp hàñ Đảng dà lơgar khoă XIII pa do neh lơh nền lơh 5 tiểu ƀan, tàm hơ̆ geh Tiểu ƀan sră nggal. Tiểu ƀan sră nggal geh kơnòl rơcang Jơnau yal cíñ trị mờ Jơnau yal tơn jơh 40 nam tam gơl pa yal Pơrjum dờng dơ̆ 14 bơh Đảng dê in. Nàng dong broă ai Tiểu Ƀan sră nggal in, Ƀan Ƀí thư kung neh lơh nền lơh Mpồl cih sră nggal, tus tŭ do, Duh broă sùm Tiểu ƀan neh cribơyai, ai jơnau đơs, ring bal mờ tơngume mpồl drơng broă, broă lơh, broă rơndap lơh mờ bơta tam pà kơnòl broă bơh Mpồl cih dê…

Đơs tàm dơ̆ pơrjum, Tổng Ƀí thư Nguyễn Phú Trọng đơs nền, Pơrjum dờng cau ala mat gùt lơgar dơ̆ 14 bơh Đảng dê là dùl broă cíñ trị kuơmàng ngan, rơp là dùl tềl kuơmàng tàm gùng bơtàu tơnguh bơh dà lơgar he dê. Tổng Ƀí thư Nguyễn Phú Trọng đơs loh, broă rơcang ală sră nggal ai Pơrjum dờng dơ̆ 14 bơh Đảng dê in, tàm hơ̆ Jơnau yal cíñ trị là jơnau yal tờm, geh gơnoar broă ai tơlik lài gùng dà ai ală sră nggal ndai bơh Pơrjum dờng dê in, den tàng pal geh lơh dùl bă jak chài, jơh nùs, tam gơl pa tàm broă lam lơh, pal gàr ngan ngồn geh bơta niam, đơs wil tơl bơta geh ngan tam gơl pa dà lơgar dê, gàr niam cồng nha pơrjum dờng dê.