Tàm khăt gơnoar broă lơi, ồng Nguyễn Phú Trọng sùm kơlôi sơnơng, jơh nùs jơh tồr mờ broă lơh kăc màng bơh Đảng mờ bơh Jơi bơtiàn dê, bal mờ Đảng Dà lơgar, Cíñ phủ đơng lam jơh gùt Đảng, gùt làng bol, gùt ling klàng he lơh geh uă cồng nha dờng geh jơnau gơtha kah yau. Ală jơnau đơs, jơnau tă pơgồp lời wơl jơnau kah niam bơh Tổng Ƀí thư ồng Nguyễn Phú Trọng dê tàm tơl tơngai, tơl gơnoar broă neh geh cih wơl, lơh gơrề uă, gơhòi tơrgùm rbô plai nùs làng bol Việt Nam dê.

Dà lơgar he ờ hềt tŭ lơi geh broă lơh, bơta pràn, bơngă mờ bơta pin dờn ală lơgar bè tŭ do, geh tai uă bơta pal geh ƀươn ƀoài nàng kơnhăp cơnđoà jơng lòt tàm gùng lòt mờ Đảng he, làng bol he mờ Wa Hồ kờñ gơboh neh săc rwah.

Dà lơgar he ờ hềt tŭ lơi geh broă lơh, bơta pràn, bơngă mờ bơta pin dờn ală lơgar bè tŭ do, geh tai uă bơta pal geh ƀươn ƀoài nàng kơnhăp cơnđoà jơng lòt tàm gùng lòt mờ Đảng he, làng bol he mờ Wa Hồ kờñ gơboh neh săc rwah.

Do là jơnau đơs nền bơh Tổng Ƀí thư ồng Nguyễn Phú Trọng dê tàm Pơrjum dơ̆ dùl Mpồl Duh broă Đảng Dà lơgar khoă XIII mờ tàm uă pơrjum kwơmàng tŭ Tổng Ƀí thư tus pơrjum mờ geh ală jơnau đơs sồr lơh kwơmàng. Ờ gŏ di mờ nisơna Tổng Ƀí thư neh đơs wih đơs wơl tus bơta do tŭ mùl màl pà gŏ, tơnơ̆ mờr 40 nam mŭt lơh dơ̆ tam gơl pa, bơh dồ dà lơgar rƀah lơ ời ngan, geh phan bơna- măy mŏk, tàm tơrbŏ phan bơna lơh sa- mpồl bơtiàn bơngơl bơgơla, bồ tơnggoh gĭt wă ờ huan wă, tus tŭ do, Việt Nam neh tồ să gơgơs là lơgar gam bơtàu tơngguh, geh priă lơh geh dimơ; niam chài, mpồl bơtiàn pơn jăt tai bơtàu tơngguh, rài kis phan bơna mờ nùs nhơm làng bol dê geh tam gơl niam; broă lơh bơ̆t bơtàu Đảng mờ ală anih lơh broă cíñ trị geh bơta tam gơl pràn; mpồl tam klăc dờng jơh gùt jơi bơtiàn sùm geh lơh kơ̆ kơl jăp; cíñ trị, mpồl bơtiàn kơ̆ kơl jăp, sền gàr dà lơgar- bơta lơngăp lơngai, lơngăp lơngai is, gơnoar tờm ù tiah dà lơgar geh gàr kơ̆; gơnoar broă mờ bơngă bơh dà lơgar dê ngai sơlơ geh yờ tơngguh tàm muh măt ală lơgar dê.

Is ồn tàm broă lơh lơh broă mờ lơgar ndai, tus mờ đơs sồr lơh tàm Pơrjum Lơh broă mờ lơgar ndai gùt lơgar, Tổng Ƀí thư ồng Nguyễn Phú Trọng đơs nền bè bơta crơng gơs, bơtàu tơngguh bơh Gah mpồl lơh broă mờ lơgar ndai, cribơyai broă mờ lơgar ndai “tờm gle Việt Nam: nggu kơnhăp, tờm kră, ntê lơbơn, gơmŭt bềng nùs nhơm, să bồ mờ bơta pràn kòn bơnus bơh jơi bơtiàn Việt Nam dê” mờ ngai sơlơ geh ală lơgar dờp sền làm uă: Ngan ngồn Gah cribơyai broă mờ lơgar ndai pal pơn jăt tai tơnggŏ geh bồ tơnggoh ngăc ngar, bơta khin cha, nùs nhơm mờ să bồ bơh rài cribơyai broă mờ lơgar ndai rài Hồ Chí Minh dê mờ tàm pơdờn đòm jăt bơhiàn lơh broă mờ lơgar ndai khin cha kră kơldang mơya kờñ gơboh bơta ring lơngai bơh jơi bơtiàn Việt Nam dê, pơn jăt tai tam gơl pa bơ̆t bơtàu mờ bơtàu tơngguh mờ gơgơs lơh broă mờ lơgar ndai cribơyai broă mờ lơgar ndai lơgar Việt Nam dê pa pràn kơldang kơ̆ kơl jăp tơl làm gơcèng bềng bơhiàn niam chài krơi is tờm gle Việt Nam.

Dùl tàm ală tềl kah gơlời wơl tàm broă lơh rơcăng lài tam dră sa kwề sa kwà bơta ờ niam tơngai bơh bồ tơngai lơh broă khoă XI tus tŭ do là broă lơh bơ̆t bơtàu, lơh niam wơl Đảng pơn jăt tai geh lơh pràn gơjăt bal mờ uă jơnau lùp gơmŭt jrô bơh Tổng Ƀí thư ồng Nguyễn Phú Trọng dê, Kwang ătbồ Mpồl Sồr lơh bè rơcăng lài tam dră sa kwề sa kwà, bơta ờ niam Dà lơgar dê. Tổng Ƀí thư ồng Nguyễn Phú Trọng đơs nền, mờ broă tơlik măt Mpồl Sồr lơh bè rơcăng lài tam dră sa kwề sa kwà, bơta ờ niam Dà lơgar dê gơ wèt Ƀộ Cíñ trị tus tŭ do, broă lơh rơcăng lài tam dră sa kwề sa kwà, bơta ờ niam “neh gơgơs srơh, gùng dà ờ gơtùi lơh sơlơ̆u wơl”. Den tàng bè hơ̆, “Jơh ală nùs nhơm ki ngàm, pleh pồn, ờ bài lơh”, “mum mbùng sa priă” halà ờ lời nùs, kờñ sơmờm đơs tìs di nàng đơs lah cau ndau, lơh lơngah lơngañ tàm dơlam is, ndrờm là ờ di”. Jăt Tổng Ƀí thư ồng Nguyễn Phú Trọng đơs, bơ̆t bơtàu, lơh niam wơl Đảng là broă lơh bơ̆t bơtàu mpồl, bơ̆t bơtàu kòn bơnus, là broă lơh kòn bơnus, ƀươn ngan gơtŭp gơrềng tus tiơng pơnrơ bơngă, bơta kwơ, gơrềng bơh kòn bơnus dê. Tài bè hơ̆, gơ sồr tơl nă he pal sền tìs di is, mblàng sền, sền swì nền nòn ală bơta wil tơl, bơta ờ hềt wil tơl bơh să tờm he dê; pal sền swì, đơs bè cau ndai. Dilah ờ ngan ngồn gĭt wă is, song dơ pă, jơh nùs loh làng, dipal den ƀươn ngan ờ rơcăng lài, sùm mìng gŏ bơta wil tơl, bơta pràn bơh he dê uă rlau mờ cau ndai; tàm tŭ mìng gŏ bơta ờ hềt wil tơl, bơta pràn bơh cau ndai dê uă rlau mờ he: Añ neh uă dơ̆ đơs rao, tŭ do añ dan đơs wơl ală cau lơi geh bồ tơnggoh do den pal ơm tĕ dồ đah ai cau ndai in lơh, rài kis kòn bơnus mìng kis geh dồ dơ̆ lơm pal kis bè lơi nàng gơ in ờ pơlai soh, ờ wờl să tài bơh ală broă lơh tìs ờ niam ờ gĭt ƀàs sìl, priă jền rơ̆ ru, lơh bơta lơi, chơ̆t geh cèng jăt bal sơl halà ờ. Tiơng pơnrơ hơ̆ sồng là bơta dờng màng kwơmàng ngan rlau jơh.

Tàm broă niam chài tŭ gam kis, Tổng Ƀí thư ồng Nguyễn Phú Trọng  kung đơs loh gơnoar broă kwơmàng ngan gĭt lơh bơh niam chài dê là bơnàng jă nùs nhơm, bơta gơn kơnờm bơtàu tơngguh bơh mpồl bơtiàn dê. Ngan kơnờm bơh geh dồ rài niam chài bềng uă bơhiàn niam chài krơi is jơi bơtiàn dê lơh bơnàng jă, jơi bơtiàn he neh sơrlèt geh tơl bơta lòng kal ke ngan, sùm bơtàu tơngguh jăt tŭ tơngai bơh jơnau kah yau dê. Ngan tài bè hơ̆, Tổng Ƀí thư ồng Nguyễn Phú Trọng is ồn sồr, jơh ală anih lơh broă cíñ trị gùt Đảng, gùt làng bol, gùt ling klàng kờñ pal pơn jăt tai gĭt wă dipal broă kwơmàng bơh niam chài dê tài bơh tàm ală ŭ đơng lam kăc màng, Đảng Kộng sản Việt Nam mờ Củ tịc Hồ Chí Minh sùm yờ tơngguh gơnoar broă niam chài dê, sùm sùm sền niam chài là dồ tiah tam dră kăc màng dê, là sơmpòl ồs “sòl pơnđàng ai làng bol dà lơgar in lòt”. Tàm Pơrjum Niam chài gùt lơgar geh lơh tàm ngai 24 nhai 11 nam 2021, Tổng Ƀí thư ồng Nguyễn Phú Trọng kung lời wơl dồ jơnau đơs bềng bơta gơmŭt jrô ngan: Cau đơs muh măt kòn bơnus geh niam chài, dồ rài kis geh niam chài, dồ jơi bơtiàn geh niam chài hơ̆ sồng rài kis niam chài, bơta mờng kwèng ơm kis niam chài, bơta lơh lòt tơm bơh bơr geh bơta niam chài…ai ală broă lơh iơh ngan broă lơh ờ niam ƀàs sìl ală broă lơh tìs mờ adăt boh lam, ƀàs sìl ƀàs sô là ờ geh bơta niam chài, là ờ gơ wèt bơta niam chài, là dră wơl bơta niam chài, bơta chờ hờp bơh kòn bơnus dê ờ gŏ di là tàm bơta uă priă jền, uă jơtài phan bơna, sào bơkah soh phan niam ờ mờ gam là bơta rơ̆ ru bè hwìng nùs geh kis tàm bơta kờñ gơboh mờ nùs nhơm kờñ gơboh kòn bơnus jơnau dipal mờ ring bal.

Tŭ gam kis, pah tŭ kờñ đơs ala jơnau đơs tàm nùs he dê, Tổng Ƀí thư ồng Nguyễn Phú Trọng sùm đơs wơl dồ jơnau tàm jơnau cih tiơng pơnrơ ngan “Lòs neh srong bè hơ̆” bơh cau cih jơnau Liên Xô dê ồng Nikolai Ostrovsky: "Bơta kwơmàng ngan rlau jơh bơh kòn bơnus dê là rài kis mờ tiơng niam kis, tài bơh rài kis kòn bơnus dê mìng kis dồ dơ̆. Pal kis bè lơi ờ gơ in pơlai soh, ờ gơ in wờl să tài bơh ală nam nhai neh kis sùm, kis pơhì pơhà; nàng ờ gơtìp ƀàs sìl tài bơh ală broă lơh tìs ờ di, ƀàs sìl ƀàs sô ngan, gơtìp tơl nă cau ñŏ tơnhial sền ờ sô; nàng tus tŭ ñim măt rơlồih tê, he gơtùi pơñiờ să, đơs là: Jơh ală rài kis he, jơh ală pràn he, he neh ơn pơdơng ai broă lơh dờng màng kwơmàng ngan rlau jơh tàm rài kis- broă lơh tam dră dong klàs jơi bơtiàn, hồ toh kòn bơnus cèng wơl bơta chờ hờp ai làng bol in!”