Bơh tơnơ̆ pơrjum dờng dơ̆ 13 bơh Đảng dê, broă tàm dunia neh geh ală bơta gơlik geh sơrbac mhar, kal ke, ờ gơtùi git lài, lơh broă lơh mờ lơgar ndai bơh Việt Nam dê ơm tềng đap uă kal ke, bơta lòng. Bulah bè hơ̆, nam 2023, 2024 neh sền gŏ ală broă lơh lơh broă mờ lơgar ndai duh hồl ngan, geh lơh sùm mờ là bơta niam pơn rơ ngan bơh dà lơgar dê. Broă bol he wă rò Tổng Ƀí thư, Củ tịc lơgar Lo ồng Tập Cận Bình, Kwang atbồ lơgar Mỹ ồng Joe Biden, Tổng Ƀí thư, Củ tịc lơgar Lào ồng Thongloun Sisoulith, Củ tịc Đảng Làng bol Campuchia ồng Hun Sen, ồng Hun Manet, pa do là Kwang atbồ lơgar Nga ồng Putin mờ uă kwang đơng lam bồ dà lơgar kuơmàng ndai tàm ală mpồl lơh broă uă lơgar bè ASEAN, Liên hợp quôk, tiah dềt Mekong, APEC, AIPA, COP 28… geh đơs là ală broă geh gơtha kah yau, pơgồp bơnah đơs nền “ờ hềt tŭ lơi lơgar he geh tŭ niam, bơta pràn, bơngă pin dờn mờ gơnoar broă tàm dunia bè tŭ do”. Gơtùi geh cồng nha do, hơ̆ là kơnờm geh dùl bơta sền sơ wì mờ dùl bồ tơngoh kơlôi sơnơng lơh broă mờ lơgar ndai krơi is bơh cau atbồ dà lơgar dê. Hơ̆ là Tổng Ƀí thư ồng Nguyễn Phú Trọng. Ồng Lê Hoài Trung, Ƀí thư Đảng dà lơgar, Kwang atbồ Mpồl lơh broă mờ lơgar ndai Đảng dà lơgar đơs: “Gơtùi gŏ, ồng Nguyễn Phú Trọng jơh nùs sền dờng màng broă lơh lơh broă mờ lơgar ndai, tàm ală jơnau đơs sùm đơs nền gơ wèt mờ khat dùl jơi bơtiàn lơi tàm tŭ tơngai crơng gơs mờ bơtàu tơnguh ndrờm pal bơsong 2 bơta là broă tàm lơgar mờ lơh broă mờ lơgar ndai, đơs loh broă lơh lơh broă mờ lơgar ndai ờ mìng là bơta jŏ jòng bơh lơh broă tàm lơgar dê mờ gam là bơta gơn kơnờm pràn ngan ai bơta bơtàu tơnguh bơh dà lơgar dê in. Dùl bơta tai là bồ tơngoh bơh Tổng Ƀí thư dê bè bơta pal lơh bè lơi nàng pơlam lơh jat gùng dà lơh broă mờ lơgar ndai lơh tờm is, lơngap lơngai is, lơh broă mờ uă lơgar, uă gah lơh broă bal, Việt Nam là bơyô mờ jơh ală lơgar, là lơgar geh jơng jơh nùs, geh kơnòl tàm mpồl bơtiàn dunia, kơ̆ dơn bồ tơngoh, jơnau pal jat bơsong ngac ngar tơl broă gơlik geh, sùm git loh broă gơlik geh pa, bơta gơlik geh mhar ngan bơh broă tàm lơgar mờ tàm dunia dê. Kuơmàng ồng sùm đơs nền, dilah tìs bè gùng dà den digơlan lơh gơbàn tìs jơh ală bơta”.

Tổng Ƀí thư ồng Nguyễn Phú Trọng sùm đơs nền tàm broă lơh broă mờ lơgar ndai “ờ mìng kơ̆ dơn bè jơnau pal jat, ờ gam pal lơbơn bè broă rơndap lơh; lơbơn niam, jak chài mơya kung kràñ cê ngan, jơh nùs ngan; ngac ngar, bơceh lơh mơya khin cha tàm tơl bơta kal ke, bơta lòng, tài lơngăp lơngai is jơi bơtiàn, tài khat gơboh, gơboh gơbài làng bol dê; tam klac bal, tàm kờñ gơboh bal mơya kràñ cê, kơ̆ dơn sền gàr bơta kuơ dà lơgar, jơi bơtiàn. Mờ broă tàm Pơrjum lơh broă mờ lơgar ndai gùt lơgar nam 2021, Tổng Ƀí thư ồng Nguyễn Phú Trọng dùl dơ̆ tai đơs nền bồ tơngoh kơlôi sơnơng “Cribơyai broă mờ lơgar ndai bơh Việt Nam dê pal ngac ngar, rơcang lài, bơceh lơh mờ lơbơn rlau drơng bơtàu tơnguh lơh sa mờ tơnguh gơnoar broă dà lơgar”… ai gŏ bơta sền gròi mờ gam là bơta kơlôi rơcang bơh kwang đơng lam bồ dờng ngan rlau jơh dà lơgar dê gơ wèt mờ broă lơh lơh broă mờ lơgar ndai. Neh uă dơ̆ Tổng Ƀí thư ồng Nguyễn Phú Trọng tơngkah là: hờ ngkời ală kwang bàng cribơyai broă mờ lơgar ndai sùm geh gùt Đảng, gùt làng bol, gùt ling klàng. Hơ̆ là bơta tờm nàng ală Kwang atbồ anih lơh broă ala mat dà lơgar in lơh niam kơnòl broă dờng màng mờ bềng kơnòl kơn jơ̆: sền gàr bơta kuơ dà lơgar, jơi bơtiàn mờ sơlơ tơnguh tai lơh broă bal dunia, drơng bơtàu tơnguh lơh sa mpồl bơtiàn dà lơgar.

Phó Giáo sư – Tiến sỹ ồng Dương Văn Quảng, lài do là Kwang atbồ Họk viện Cribơyai broă mờ lơgar ndai (Ƀộ cribơyai broă mờ lơgar ndai) đơs là: đơs bè Tổng Ƀí thư ồng Nguyễn Phú Trọng là đơs bè tềl lời wơl bơh dùl nă cau “lơh geh bơta gơn kơnờm”, mblàng wơl bơta gơn kơnờm ai gah cribơyai broă mờ lơgar ndai bơh Việt Nam dê in: “Tổng Ƀí thư ồng Nguyễn Phú Trọng pah dơ̆ pơrjum cribơyai broă mờ lơgar ndai tŭ lơi kung geh ală jơnau đơs nàng tơngkah kwang bàng cribơyai broă mờ lơgar ndai bơh Việt Nam dê. Ală tơngume jơnau nting tơngkah hơ̆ là 1 nă kwang bàng cribơyai broă mờ lơgar ndai rài pa ờ gơtùi huĭ bơhiàn ờs mờng. Cribơyai broă mờ lơgar ndai pal sơn đờm bơh bơta kuơ dà lơgar, jơi bơtiàn, bal mờ hơ̆ cau rài do pal geh jơnau git wă pa, broă lơh pa mờ pal lơh kơlôi sơnơng. Bol hi git wă dunia pa hơ̆ sồng gơtùi cribơyai mờ khi. Hơ̆ là jơnau nting tơngkah bơh Tổng Ƀí thư dê gơ wèt mờ gah cribơyai broă mờ lơgar ndai lơgar Việt Nam dê”.

Ai Kwang atbồ Anih lơh broă ala mat lơgar Việt Nam tàm lơgar Nga ồng Đặng Minh Khôi sùm kah tus jơnau nting tơngkah bơh kwang đơng lam bồ dờng ngan rlau jơh dà lơgar dê – hơ̆ là tơl nă kwang atbồ Anih lơh broă ala mat dà lơgar, Kwang atbồ Cau ala mat anih lơh broă Việt Nam tàm lơgar ndai pal ai tơnggŏ niam chài, bơta niam, nùs nhơm bơh cau Việt Nam dê. Kuơmàng, ală cau lơh broă cribơyai mờ lơgar ndai pal chồl tơnguh nùs nhơm tàm kờñ gơboh bal kòn bơnus, git lơbơn, git kràñ cê, git tŭ tơngai, git tŭ niam, git he, git cau, git ruc, git guh. Jơh ală tài bơta kuơ dà lơgar, jơi bơtiàn: “Tổng Ƀí thư ồng Nguyễn Phú Trọng đơs là, cribơyai broă mờ lơgar ndai bơh Việt Nam dê pal ai tơnggŏ niam chài, bơta niam, nùs nhơm kòn bơnus Việt Nam dê. Tàm khat dùl broă lơi gơlik geh kung ndrờm kơ̆ dơn, khin cha jak chài mơya kung pal lơbơn, ngac ngar bè tờm gle, sùm cèng nùs nhơm brồ guh, bulah tàm bơta lơi kung pal sùm gàr kơ̆ gùng dà he dê”.

Kwang atbồ Anih lơh broă ala mat lơgar Lo tàm lơgar Việt Nam ồng Hùng Ba đơs nền: Ală nam rềp ndo, Việt Nam lam lơh broă lơh “Cribơyai broă mờ lơgar ndai jat gùng dà lơh tờm is, ai bơta kuơ làng bol lơh tờm” ngac ngar bè broă rơndap lơh, jat bơta gàr kơ̆ lơngap lơngai is, lơh tờm is, jơh nùs bơtàu tơnguh bơta git gơp lơh bơyô mờ ală lơgar tàm dunia. Broă lơh lơh broă mờ lơgar ndai bơh Việt Nam dê neh lơh geh uă cồng nha kuơmàng, ai lài bơtàu tơnguh bơta git gơp mờ ală lơgar rềp bal, lơgar dờng mờ ală lơgar lơh broă bal, lơh bơyô bal ờs mờng, kơ̆ dơn kờñ rài lơh broă uă lơgar.

Ală cồng nha hơ̆, cèng tềl lời wơl bơh “cau lơh geh bơta gơn kơnờm” – Tổng Ƀí thư ồng Nguyễn Phú Trọng dê. Mờ bồ tơngoh ồng dê rơp pơn jat tai là bơta gơn kơnờm là gùng dà lơh broă mờ lơgar ndai bơh Việt Nam dê sơrlèt gan bơta lòng, ờ ruc wơl tềng đap kòl yan, kal ke tàm dùl dunia uă tam gơl bè tŭ do.