VOV4.K’ho- Drim ngai 24/01, Tổng Ƀí thư ồng Nguyễn Phú Trọng lam bồ mpồl kwang bàng bơh dà lơgar dê neh tus còp, nting bơr sa tềp Đảng ƀộ, gơnoar atbồ mờ làng bol càr Bắc Ninh. Đơs tàm dơ̆ lơh broă, Tổng Ƀí thư ồng Nguyễn Phú Trọng sồr, Bắc Ninh pal pơn jat tai tơrgùm pơlam lơh jat, mblàng yal uă Nghị quyết pơrjum dờng dơ̆ 13 bơh Đảng dê mờ Nghị quyết pơrjum dờng dơ̆ 20 Đảng ƀộ càr, lơh nùs nhơm nghị quyết gơ mut tàm jơh gùt Đảng, gùt làng bol, lơh tơl nă cau git wă tơl làm, git uă bè tŭ niam, ƀuơn ƀuài pal git, pal tơnguh; ală kal ke, bơta lòng pal lơh ngan sơrlèt gan.

 Ờ gŏ di sền ờ sơp, hừh nùs mờ ală cồng nha neh lơh geh. Đảng ƀộ càr pal mhar kờp sền ală broă neh gơtùi lơh, ală broă ờ hềt gơtùi lơh, nàng bơh hơ̆, lam lơh jat ngan ngồn gùng dà, jơnau kờñ, kơnòl broă gơs ală broă lơh, broă rơndap lơh, rơndap broă mờ nùs nhơm lơh ngan uă rlau tai, lam lơh jơh nùs, kràñ cê rlau, tơnguh ală bơta pràn, bơta ƀuơn bơh càr dê.

Cau mblàng K’Duẩn