Tàm dơ̆ lơh broă, đơs wơl ală bơta niam bơnĕ pơgăp mờ do mờr 10 nam tus còp mờ lơh broă tàm càr Lạng Sơn, Tổng Ƀí thư ồng Nguyễn Phú Trọng tơlik nùs nhơm chờ hờp tềng đăp mờ ală tam gơl bơh càr do dê bal mờ kuang ai tơngŏ loh ală broă lơh gam ờ niam ờ pràn bè: Broă lơh sa bơh càr dê gam dềt; bơtàu tơnguh ờ hềt di pal mờ bơta geh, bơta pràn mờ broă geh nàng bơtàu tơnguh càr dê. Bơta niam tơmù rơƀah mờ tơmù rơƀah kơl jăp gam uă kal ke, tàm hơ̆ uă ngan tàm tiah ngài, tiah kơh bơnơm ñhoa, tiah làng bol kòn cau...

Bè kơnòl tòm tàm tơngai tus, Tổng Ƀí thư ồng Nguyễn Phú Trọng sồr, Đảng ƀộ càr Lạng Sơn ai geh jơnau kờñ, kơnòl tờm geh lơh mờ broă lơh pràn nàng tơrgùm đơng lam, lam lơh, ai geh broă tam gơl pa, pràn kơl dang rơlao tai, tàm broă bơtàu tơnguh lơh sa mpồl bơtiàn bè Nghị quyết Pơrjum dờng Đảng ƀộ càr neh ai. Tàm hơ̆ pal ai tơngŏ loh, bơtàu tơnguh lơh sa mpồng nhàr dà lơgar ờ mìng nàng bơtàu tơnguh lơh sa càr dê mờ kwơ màng rơlao tai là nàng pơgồp bal tàm broă bơtàu tơnguh lơh sa gùt lơgar dê, tàm hơ̆ uă ngan là ală càr hờ đah tô dà lơgar mờ tơnguh nùs nhơm rềp bal git gơ̆p, pin dờn bal mờ lơgar Lo.