VOV4.K’ho - Mho òr (31/03), tàm hìu lơh broă Đảng, dà lơgar, Tổng Ƀí thư ồng Nguyễn Phú Trọng neh cri bơyai tàm điện thoại dờng màng mờ Thủ tướng lơgar Đức, Kwang đơng lam Đảng Dân chủ Xã hội lơgar Đức ồng Olaf Scholz.

      Tổng Ƀí thư ồng Nguyễn Phú Trọng cri bơyai tàm điện thoại mờ Thủ tướng lơgar Đức ồng Olaf Schoz

Tàm dơ̆ cri bơyai tàm điện thoại, Thủ tướng lơgar Đức ồng Olaf Scholz chờ gờm cồng nha lơgar Việt Nam tàm broă tơnguh bơtàu dà lơgar, tơnguh uă gơnoar bal mờ bơngă dunia mờ đơs tus mờ broă sền kwơ bơh lơgar Đức dê gơwèt mờ broă lơh git gơ̆p, lơh broă bal jŏ jòng đah lơgar Đức mờ lơgar Việt Nam gam tơnguh bơtàu niam bơnĕ, geh uă bơta niam nàng pơn jăt tai tơnguh bơtàu pràn kơl dang. Bàr kwang đơng lam ring bal geh đơng lam broă chồl pràn broă lơh bal tàm ală gah broă mờ bàr lơgar geh sền gròi tàm tơngai tus. Bè broă tàm dà lềng đah măt tơngai lik, bàr lơgar ring bal bè broă geh kwơ bơh broă gàr niam bơta ring lơngai, ring niam, lơh broă bal, tơnguh bơtàu mờ git jơnau mờ adăt boh lam dunia, tàm hơ̆ geh Kông ước nam 1982 bơh Liên hợp quốc bè adăt dà lềng. Bè broă do, Tổng Ƀí thư ồng Nguyễn Phú Trọng đơs gùng dà broă lơh bơh lơgar Việt Nam là sền kwơ ală kơrnoăt tờm bơh Liên hợp quốc, kơ̆p kờñ ală gah gơrềng bal chồl pràn broă cri bơyai nàng tơn jơh tam dră ling klàng, lơh geh wơl bơta ring lơngai tàm tơngu me git jơnau bal tus mờ bơta kwơ di pal bơh ală gah dê, di pal mờ adăt boh lam dunia dê.

Cau mblàng Ndong Brawl