Mho ngai 22/05, tàm Hìu duh broă Đảng Dà lơgar, Tổng Ƀí thư ồng Nguyễn Phú Trọng neh geh dơ̆ cribơyai mờ Kwang ătbồ Đảng Lơgar Nga Tơrgùm dùl, Phó Kwang ătbồ Mpồl duh broă Lơngăp lơngai Dà lơgar Nga ồng Dmitry Medvedev gam geh dơ̆ lòt còp ngan ngồn lơgar Việt Nam bơh ngai 21 tus ngai 23/05 do jăt Jơnau ring bal Lơh broă bal đah Đảng Kộng sản lơgar Việt Nam mờ Đảng “Lơgar Nga Tơrgùm dùl”.

Tàm dơ̆ cribơyai, bàr nă kwang đơng lam bồ tơlik nùs nhơm chờ hờp bè gĭt gơ̆p lơh bơyô bal ờs mờng bơh yau niam bơnĕ mờ Tam klăc lơh broă bal jŏ jòng tơl làm đah 2 lơgar mờ gĭt gơ̆p lơh broă bal niam bơnĕ ngan đah bàr Đảng jăt tàm bơta pin dờn cíñ trị uă ngan, tơngŏ bơh ală dơ̆ cribơyai kwang bàng kâp dờng đah bàr lơgar, bàr Đảng.

Đơs sùm, Việt Nam sùm sền dờng màng bơta kờñ bal, dong kờl kwơmàng ngan bơh làng bol lơgar Liên Xô mờ làng bol lơgar Nga oh mi dê, ồng Nguyễn Phú Trọng đơs nền tàm broă lơh lơh broă mờ lơgar ndai bơh he dê, Việt Nam sền kwơmàng gĭt gơ̆p lơh bơyô bal ờs mờng bơh yau, Tam klăc lơh broă bal jŏ jòng tơl làm mờ lơgar Nga, Đảng Kộng sản Việt Nam sền dờng màng broă bơtàu tơnguh gĭt gơ̆p mờ ală Đảng cíñ trị tàm lơgar Nga, tàm hơ̆ geh Đảng “Lơgar Nga Tơrgùm dùl”, lơh bơta pin dờn cíñ trị ai gĭt gơ̆p jŏ jòng mờ kơ̆ kơl jăp đah 2 lơgar in.