VOV4.K’ho- Mho ngai 06/06, tàm Hìu lơh broă Đảng dà lơgar, Tổng Ƀí thư ồng Nguyễn Phú Trọng neh tìp mat cribơyai Kwang bàng kấp dờng mờ Củ tịc Đảng Mặt trận tơngklàs Mozambique (Frelimo), Kwang atbồ lơgar Mozambique ồng Filipe Jacinto Nyusi mờ broă lơh pờ tơlik tàm internet.

Dơ̆ tìp mat cribơyai tàm internet

Tàm nùs nhơm rềp mềl, gĭt gơ̆p bal, Củ tịc Đảng Frelimo, Kwang atbồ lơgar Mozambique đơs niam uă bơta kwơ, bơta kwơ màng bơh dơ̆ tìp mat cribơyai tàm broă sơlơ tơnguh gĭt gơ̆p lơh bơyô bal, lơh broă bal niam bơnĕ đah 2 Đảng, 2 lơgar dê. Tổng Ƀí thư ồng Nguyễn Phú Trọng đơs sùm, Mozambique là dùl tàm ală lơgar Việt Nam lài ngan tơnguh gĭt gơ̆p tàm câu Phi.  Kwang đơng lam bồ 2 Đảng, 2 lơgar ring bal pơn jat tai sơlơ tơnguh gĭt gơ̆p lơh broă bal đah Đảng Kộng sản Việt Nam mờ  Đảng Frelimo at gơnoar broă pơlam gùng dà tàm broă bơtàu tơnguh gĭt gơ̆p lơh broă bal uă gah 2 lơgar dê ngai sơlơ geh lơh ngan ngồn mờ geh cồng nha; ngui niam bơta pràn mờ bơta ƀuơn bơh tơl gah dê nàng kờñ lơh pràn lơh broă bal cíñ trị- lơh broă mờ lơgar ndai- kă bro, sền gàr lơngap lơngai- sền gàr dà lơgar, bơto bơtê, nhơl chờ, niam chài mờ tìp mat lơh kuèng làng bol 2 lơgar dê...

Cau mblàng K’Hạnh