VOV4.K’ho - Tơnkah 77 nam ngai đah jum ntào tam lơh (23/9/1945 - 23/9/2022)- là bơta niam rài lài do jăk chài Dà lơgar dê, drim òr (23/09), tàm ƀòn dờng Hồ Chí Minh, Tổng Ƀí thư ồng Nguyễn Phú Trọng đơng lam dơ̆ klơh broă mờ Mpồl đơng lam Đảng ƀộ mờ kwang bàng tờm ƀòn dờng Hồ Chí Minh dê bè broă lơh jăt Nghị quyết Pơrjum dờng dơ̆ 13 Đảng dê bal mờ Nghị quyết Pơrjum dờng dơ̆ 11 Đảng ƀộ ƀòn dờng bơh bồ tơngai lơh broă tus tŭ do.

                             Tổng Ƀí thư ồng Nguyễn Phú Trọng at tê mờ ală kwang bàng

Tổng Ƀí thư ồng Nguyễn Phú Trọng đơs niam ală broă lơh ngan mờ cồng nha mờ Đảng ƀộ, gơnoar atbồ bal mờ làng bol ƀòn dờng Hồ Chí Minh dê neh lơh geh tàm tơngai pa do, bŭ lah bè hơ̆, Tổng Ƀí thư kung ai tơngŏ loh ală broă lơh ngan geh, ờ pràn bơh ƀòn dờng dê. Tổng Ƀí thư ồng Nguyễn Phú Trọng đơs là: Tơngai tus, ƀòn dờng pal chồl pràn rơlao tai broă lơh niam wơl lơh sa ƀòn dờng dê pơgồp bal mờ tam gơl pa broă tơnguh; tơrgùm ai lài bơta pràn nàng lơh geh cồng nha ală broă lơh pràn jŏ jòng, bơsong ală kal ke, tiah gơtìp kòl bè kơrnoăt, broă bơ̆t bơtàu phan bơna bal mờ bơta pràn tŭ do, tơnguh niam rơlao tai gơnoar lam lài, bơta pràn tơnguh bơtàu pràn ngan bơh ƀòn dờng dê gơwèt mờ tiah đah jum măt tơngai lik, di pal “tiah pràn kơl dang”, là “Tiah pơnrơ niam đah jum măt tơngai lik”, “Nùs nhơm pin dờn mờ pơnyờ să gùt lơgar”.

Cau mblàng Ndong Brawl