VOV4.K’ho- Ngai 27/09/2022, tàm Hìu duh broă Đảng dà lơgar, ồng Nguyễn Phú Trọng, Tổng Ƀí thư Đảng dà lơgar đơng lam pơrjum Ƀan Ƀí thư nàng sền swì, lơh jăt adat lơh glài ală kwang bàng: Tô Anh Dũng, Ủy viên Mpồl đơng lam Đảng, Thứ trưởng Ƀộ Ngoại giao; Nguyễn Quang Linh, Kwang dong broă ồng Phạm Bình Minh, Ủy viên Ƀộ Cíñ trị, Phó Thủ tướng duh broă sùm Cíñ phủ.

Tơnơ̆ tŭ sền swì jơnau sồr bơh Ủy ƀan Sền swì Dà lơgar dê, Ƀan Ƀí thư sền gŏ: Ồng Tô Anh Dũng mờ ồng Nguyễn Quang Linh neh ờ gŏ bơsram tàp nùs nhơm bồ tơngoh, gơtìp gơplơ̆ gơhŭc bè nùs nhơm bồ tơngoh cíñ trị, rài kis; lơh tìs jơnau sồr bơh Đảng dê mờ adat boh lam Dà lơgar dê bè rơcăng sơndră sa kwề sa kwà, bơta ờ niam; lơh tìs Jơnau sồr bè ală bơta đảng viên ờ geh lơh mờ kơnòl lơh krơh, lơh gơbàn jơnau gơlời wơl kơn jơ̆ ngan, pơneh iơh, ờ suk tàm mpồl bơtiàn; lơh gơrềng ờ niam tus bơngă bơh mpồl đảng dê. Jăt tàm tơngume, broă lơh, bơta kơn jơ̆, jơnau gơlời wơl, jơnau bơh tài gơbàn lơh tìs; jăt jơnau sồr bơh Đảng dê bè lơh glài đảng viên lơh tìs, Ƀan Ƀí thư lơh nền lơh glài Tơlik bơdìh Đảng gơwèt mờ ală ồng: Tô Anh Dũng, Nguyễn Quang Linh.

Cau cih VOV Tây Nguyên- Cau mblàng Lơ Mu K’Yến